«Inter» futbol boýunça Italiýanyň çempionatynyň tamamlanmagyna üç tapgyr galanda, wagtyndan öň ýeňiji boldy we çempionlyk titulyny gazandy.
Seriýa A-nyň 35-nji tapgyrynyň oýnunda milan kluby öz meýdançasynda «Parmany» 2:0 hasabynda ýeňdi. Topara ýeňiş getiren gollary Markus Týuram (45+1) we Genrih Mhitarýan (80) geçirdi.
Bu ýeňişden soň «Inter» 82 utuk toplady we 70 utugy bolan ikinji ýerdäki «Napoli» üçin elýetmeze öwrüldi. «Neradzurriler» üçin bu çempionlyk taryhdaky 21-nji ýeňişdir.
Häzirki üstünligi topar Simone Indzagi Saud Arabystanynyň «Al-Hilal» klubuna gideninden soň, iýun aýynda baş tälimçi wezipesine bellenen Kristian Kiwunyň ýolbaşçylygynda baýram edýär.
Seriýa A-da gazanan çempionlyk titullarynyň sany boýunça «Inter» indi taryhda ikinji orny eýeleýär. Ol diňe 36 ýeňşi bolan Turiniň «Ýuwentus» klubundan yzdadyr.
Şu möwsümde milan klubunyň «Altyn dubl» etmäge, ýagny bir möwsümde iki uly ýeňiş gazanmaga hem mümkinçiligi bar. Milli çempionatdaky ýeňişden başga-da, «Inter» Italiýanyň Kubogynyň finalyna hem çykdy we onda Rimiň «Lasio» komandasy bilen duşuşar.
