Täze möwsümiň öňüsyrasynda futbol klublary aýakaldygyna pullaryny sanamagy we täze oýunçylary satyn almagy dowam etdirýär. Käbirleri ýaş zehinlere ynam bildirse, beýlekileri uly tejribä bil baglaýar.
Türkiýäniň «Trabzonspor» kluby «Beşiktaşyň» esasy transfer maksady bolan müsürli hüjümçi Mohamed Salahy özüne çekdi.
«Liwerpuldan» gideninden soň erkin agent bolan 34 ýaşly hüjümçi iki ýyl möhlet bilen şertnama baglaşdy. Ol 61-nji belgi bilen çykyş eder.
Mundan öň «Beşiktaşyň» direktory Önder Özen futbolçynyň wekilleri tarapyndan maliýe talaplarynyň aşa ýokary bolmagy sebäpli klubuň Salah bilen gepleşikleri wagtlaýyn togtadandygyny aýdypdy.
Ýatladyp geçsek, 2025/26 möwsümi tamamlanandan soň, Salah mersisaýd klubundan gitdi. Ol «Liwerpulda» 2017-nji ýyldan bäri çykyş edýärdi we onuň bilen iki gezek Angliýanyň çempionatyny we Çempionlar ligasyny utdy.
«Trabzonspor» geçen möwsümde Türkiýäniň Superligasynda üçünji ýeri eýeledi.
Onýança Niderlandlarda «Aýaks», ahyrsoňy, Mark-Andre ter Ştegeniň «Barselonadan» geçendigini mälim etdi. 34 ýaşly derwezeban Amsterdam kluby tarapyndan bir ýyllyk kärendä alyndy.
Derwezebanyň transferi salgyt tölegleri we oýunçynyň öz zähmet hakynyň paýlanylyşy bilen bagly çekişmeler sebäpli gijikdirilipdi, ýöne ahyrynda taraplar ylalaşdy. Şeýlelikde, nemes oýunçysy 2026-njy ýylyň ýanwar kärendesinden soň geçen möwsümde «Žironada» bile işleşen tälimçisi Miçel bilen ýene birleşdi.
«Aýaks» şeýle hem 30 ýaşly nemes ýarymgoragçysy Ýulian Brandt bilen şertnama baglaşandygyny tassyklady. Oýunçy «Borussia Dortmund» bilen ýedi ýyllyk şertnamasyny tamamlandan soň erkin agent hökmünde Amsterdama göçdi. Ol klub bilen üç ýyllyk şertnama baglaşdy (2029-njy ýylyň iýunyna çenli).
Angliýanyň transfer bazary hem mydamakysy ýaly işjeň dowam edýär. «Arsenal» «Nýukasl» bilen Braziliýanyň ýygyndysynyň ýarymgoragçysy Bruno Gimaraeşiň, takmynan, 88 mln ýewro möçberindäki transferini ylalaşdy. 28 ýaşly hawbek bilen şertnamanyň şahsy şertleri iýul aýynda ylalaşylypdy.
Munuň bilen bir hatarda, «Arsenal» Madridiň «Realy» bilen şertnamasyny uzaltmaga gyssanmaýan braziliýaly winger Winisius Žuniora göz dikýär. «Marca» neşiri «Realyň» braziliýalynyň öňünde şert goýandygyny ýazýar — Madrid klubynyň mundan beýläk oýunçynyň şertnamasyndaky şertleri gowulandyrmak niýeti ýok. Winisiusdan belli-külli netijä garaşýarlar. «Real» 26 ýaşly hüjümçi bilen ýa-ha ylalaşygy uzaltmak, ýa-da ony şu tomus satmak isleýär.
«Çelsi» hem bazardan yza galanok. Londonlylar Fransiýanyň ýygyndysynyň goragçysy Maksans Lakruanyň «Kristal Pelasdan» 52 million funt sterlinge (takmynan, 60,3 million ýewro) geçendigini yglan etdi. Şertnama 2032-nji ýyla çenli hereket edýär.
Mundan başga-da, Habi Alonsonyň toparynyň düzümine tejribeli iňlisler — 35 ýaşly hüjümçi Deni Welbek we «Liwerpulyň» öňki ýarymgoragçysy, 36 ýaşly Jordan Henderson goşuldy. Ikisem 2028-nji ýyla çenli ylalaşyk baglaşdy. Mundan öň «Çelsä» Morgan Rojers bilen Marko Palestra goşulypdy.
Turiniň «Ýuwentus» kluby transfer bazarynyň esasy oýunçylarynyň biri boldy. Klub «PSŽ-den» fransuz hüjümçisi Randal Kolo Muanini 38 million ýewro (goşmaça 12 million bonus) satyn aldy. «Baýere» bolsa klub 18 ýaşly bosniýaly winger Kerim-Sem Alaýbegowiç üçin 32 million ýewro töledi. Iki futbolçy bilen hem bäşýyllyk ylalaşyk baglaşyldy.
Könbe iňlis kluby «Fulhem» öz gezeginde «Realyň» birbada iki oýunçysynyň — hüjümçi Gonsalo Garsiýanyň (40 mln ýewro + 2 mln bonus) we ýarymgoragçy Sesar Palasiosyň (10 mln ýewro) transferlerini tassyklady. Ýaş futbolçylar bilen şertnama baglaşylmagyny London toparynyň täze baş tälimçisi Alwaro Arbeloa haýyş eden eken (hawa, «Realyň» öňki tälimçisi indi şol ýerde işleýär).
Ýene bir Madrid kluby — «Atletiko» bolsa «PSŽ-den» günorta koreýaly ýarymgoragçy Li Kan Ini satyn aldy. 25 ýaşly futbolçy bilen şertnama 2031-nji ýylyň 30-njy iýunyna çenli niýetlenýär. KHBS-iň maglumatlaryna görä, şertnamanyň möçberi 35 million ýewro barabar, ýene 5 million ýewrony fransuz kluby bonus hökmünde alyp biler.
Fabrisio Romanonyň maglumatyna görä, ýene bir uly transfer golaýlaşýar — «Liwerpul» we «PSŽ» Bredli Barkolanyň ykbalyny çözjek bolýarlar: iňlisler fransuz üçin 100 mln ýewrodan biraz köpräk hödürleýär, ýöne parižliler muny hatda aram-aram meýdança çykýan oýunçy üçin hem az görýär.
