Gazagystanyň parlamenti Olžas Bektenowy premýer-ministr wezipesi boýunça ikinji möhlete tassyklady, täze döredilen wise-prezidentlik wezipesine bolsa Ýerlan Karin bellenildi. Bu baradaky degişli permany Gazagystanyň Prezidentiniň resmi saýty neşir etdi.
Dalaşgärleriň ikisini hem ýurduň Prezidenti Kasym-Žomart Tokaýew hödürledi.
Bektenowyň öz işini dowam etdirmegi üçin mejlise gatnaşan 145 deputatyň 137-si ses berdi. Karini bolsa 141 deputat goldady.
Bektenow 2024-nji ýylyň fewral aýyndan bäri Gazagystanyň Hökümetine ýolbaşçylyk edip gelýär. Ol mundan öň Prezident diwanynyň ýolbaşçysy we Korrupsiýa garşy göreş gullugynyň başlygy wezipelerinde işledi.
Karin dürli ýyllarda Gazagystanyň Prezidentiniň döwlet geňeşçisi, döwlet sekretary we kömekçisi wezipelerinde zähmet çekdi. 2026-njy ýylyň tomsunda ol Prezident diwanynyň ýolbaşçysynyň birinji orunbasary wezipesine bellenilipdi.
Käbir täze wezipä bellenmeler Gazagystanda täze Konstitusiýanyň kabul edilmeginden soň amala aşyryldy. 15-nji martda makullanan täze Konstitusiýa iki palatalydan bir palataly parlamente geçmegi göz öňünde tutýar. Senat we Mejlis wezipeleriniň deregine ýurduň täze ýokary wekilçilikli edarasy bolan Gurultaý öz işine başlady. Mundan başga-da, Gazagystanda täze ýokary maslahat beriji edara boljak Halk geňeşi hem döredilýär.
