Siena International Photo Awards (SlPA) 2026 fotobäsleşiginiň emin agzalary «Suwasty ýaşaýyş» kategoriýasyndaky iň gowy suratlary saýladylar.
Suratçylar deňiz guşlarynyň aw awlaýyşlaryny, balyklaryň köpçülikleýin toplanyşlaryny, seýrek suwasty däp-dessurlary we ummanda ýaşaýan jandarlary olaryň tebigy gurşawynda surata düşürdiler.
Ýabany tebigatyň suratçysy Nur Taker demirgazyk sümsük guşlarynyň suw astynda aw awlaýyşlaryny görkezýän suraty bilen bäsleşigiň ýeňijisi boldy.
Birinji orun: «Ummandaky başagaýlyk» / © Nur Tucker
Demirgazyk sümsük guşlary balykçylaryň zyňan balyklarynyň üstünde uruşýar. Guşlar howadan başaşaklygyna inip, suwuň astynda darkaşyny dowam etdirýär. Bu hili iýmitleniş adam işjeňliginiň haýwanlaryň hereketine täsirini görkezýär: emeli usulda iýmit bolçulygyny döretmek howply bäsdeşligi döredýär.
Ikinji orun: «Akula derwezesi» / © Linda Ness
Günorta Afrikanyň Transkeý kenarýakasyndaky sardinalaryň her ýylky ýörişinde akula, töweregindäki gaýda-gaýmalaşygy piňine alman, gür balyk sürüsiniň içinden geçip barýar.
Üçünji orun: Mandarinbalyklaryň jübütleşme tansy»/ © Luc Rooman
2025-nji ýylyň dekabrynda Lýuk Ruman iki hepdeläp Lembeh bogazynda wulkanly deňiz düýbüni öwrendi. Alagaraňkyda suwa çümen wagtynda, ol mandarinbalyklaryň seýrek jübütleşme dessuryny surata düşürdi: açyk reňkli balyk jübütleri merjen jeňňelliginden suw gatlagyna gysga wagtlyk çykyp, derrewem ýitip gidýärler.
Eminleriň ýokary bahasy: «Ýene balyk tutmaga barýas»/ © Romain Barats
Pingwinleriň topary Antarktidanyň buz ýaly suwlaryny parran böwsüp, günorta tomsunyň iň gyzgalaňly döwründe Port-Şarko burnunyň golaýyndan geçip barýar.
Eminleriň ýokary bahasy: «Agyr ýük»/ © Noam Kortler
Filippinlerdäki Moalboal adasynyň golaýynda bissa deňiz pyşbagasy uly sardina sürüsiniň ýanynda ýüzüp ýör. Balyklar ony şeýle bir jebis gurşap alypdyr welin, göýä, ol çanagynda kümüşsow bedenleriň tutuş bir buludyny göterip barýan ýaly. Bissa deňiz pyşbagalaryna ýitip gitmek howpy abanýar we olar merjen rifleriniň ekoulgamlarynda, esasanam, deňiz gubkalarynyň aşa köpelip gitmegini gözegçilikde saklamakda möhüm orun eýeleýär.
Eminleriň ýokary bahasy: «Balyklardan düzülen altyn şar»/ © Linda Ness
Afrikanyň gündogar kenarýakasynda sardina sürüsini ýyrtyjy haýwanlaryň gurşap almagy. Delfinler we Braýd läheňleri, tä tutuş sürüden birnäçe balyk diri galýança, olaryň aýlanyp duran şar şekilli toparyna gaýta-gaýta hüjüm edýärler.
Eminleriň ýokary bahasy: «Bops balyklarynyň aw awlaýşy» / © Gonzalo Pérez Mata
Ortaýer deňziniň bops balyklarynyň sürüsi (Boops boops) Ispaniýanyň günortasyndaky La-Erraduranyň kenarýakasynda Rhizostoma luteum meduzasyny yzarlaýar. Meduzany töwereklän balyklar onuň dokumalary bilen iýmitlenýärler.
Eminleriň ýokary bahasy: «Ýyldyzlar deňzi» / © Sage Ono
Ýaş uçýan balyk öz sudury gaýtalanýan ummanyň ýüzüne golaý ýerde dury ýüzgüçlerini giňden açýar. Ýel bilen tolkunlaryň täsiri netijesinde bu ýerlerde ýaş balyklar we suwuň ýüzünde ýüzüp ýören zibilleri ýygnaýan «deňiz asudalyk zolaklary» emele gelip bilýär.
Eminleriň ýokary bahasy: «Maňa seret» / © Reiko Takahashi
Masgarabaz balyk deňiz aktiniýasynyň murtlarynyň arasyndan jyklaýar. Bu goňşuçylyk özara bähbitli: aktiniýa balygy ýyrtyjylardan goraýar, balyk bolsa öz gezeginde gaçybatalgasynyň töweregindäki suwuň aýlanyşygyny gowulandyryp, ony iýmit maddalary bilen üpjün edýär.
Beýleki finalçylaryň suratlaryny SIPA 2026 baýragynyň resmi web sahypasynda görüp bolýar.
