HelloSafe seljeriş hyzmaty ilatynyň durmuş abadançylygy ýokary bolan ýurtlaryň sanawyny çap etdi. 178 döwleti öz içine alýan reýtingde Norwegiýa birinji orny eýeledi.
Diňe ykdysady görkezijilere esaslanýan beýleki reýtinglerden tapawutlylykda, «HelloSafe Prosperity Index» atly bu görkeziji girdejileriň ilatyň arasynda nähili paýlanýandygyny we adamlaryň ýaşaýyş derejesini hem göz öňünde tutýar.
Seljerijiler Halkara pul gaznasynyň, Bütindünýä bankynyň we Birleşen Milletler Guramasynyň maglumatlaryny peýdalandylar. Olar jemi içerki önümi, adam başyna düşýän milli girdejini, adamyň ösüş derejesini, girdejilerdäki deňsizligi we garyplygyň ýaýraýşyny seljerdiler. 2026-njy ýylda dünýä boýunça ortaça görkeziji 100/ 59,2 bala deň boldy.
Reýtingiň ilkinji onlugyna giren ýurtlar:
Norwegiýa — 99,4 bal;
Irlandiýa — 97,7 bal;
Islandiýa — 97,5 bal;
Niderlandlar — 97,2 bal;
Daniýa — 96,2 bal;
Belgiýa — 95,0 bal;
Şweýsariýa — 94,6 bal;
Singapur — 94,5 bal;
Birleşen Arap Emirlikleri — 94,0 bal;
Finlýandiýa — 93,5 bal.
Ilkinji 15 ornuň 12-sini ýewropa ýurtlary eýeledi. Norwegiýa adam başyna düşýän jemi içerki önüm, milli girdeji we adamyň ösüş derejesi boýunça iň ýokary netijeleri görkezdi. Irlandiýa ikinji orna çykdy. Emma bu ýurduň ykdysady görkezijileriniň ep-esli bölegi öz girdejileriniň uly bölegini Irlandiýada hasaba alýan halkara kompaniýalaryň işi bilen baglanyşyklydyr.
Reýtingiň garaşylmadyk netijeleriniň biri, ABŞ-nyň we Polşanyň görkezijileriniň biri-birine golaý bolup çykmagydyr. Sanawda ABŞ 27-nji, Polşa bolsa 28-nji orny eýeledi. Amerikanyň Birleşen Ştatlary 87 bal, Polşa bolsa 86,7 bal toplady.
Şol bir wagtyň özünde, satyn alyjylyk ukyby göz öňünde tutulyp hasaplananda, adam başyna düşýän jemi içerki önüm boýunça ABŞ öňdeligini saklaýar. Emma Polşada girdejiler ilatyň arasynda has deň paýlanýar. Girdejilerdäki deňsizligi görkezýän Jini koeffisiýenti Polşada, takmynan, 28-e deň bolsa, ABŞ-da bu görkeziji 40-a barabar.
Reýtingde Russiýa 50-nji, Hytaý 71-nji, Hindistan bolsa 101-nji orny eýeledi.
Sebitler boýunça alanyňda, Ýewropa ortaça 84,7 bal bilen öňdeligi eýeledi. Ondan soň Aziýa 63,8 bal, Amerika 61,5 bal, Afrika bolsa 34,7 bal bilen sanawda öz ýerini tapdy.
