Toyota ýapon awtoulag ägirdi 3,6 milliard dollarlyk iri möçberli maýa goýum meýilnamasyny tassyklady. Bu serişdeler ABŞ-nyň Tehas ştatyndaky San-Antonio şäherinde ýerleşýän "Toyota Motor Manufacturing Texas" zawodyny döwrebaplaşdyrmaga we giňeltmäge gönükdiriler.
Taslamanyň esasy maksady — orta ölçegli "Tacoma" pikaplarynyň ýygnamasyny Meksikadaky önümçilik meýdançalaryndan ABŞ-nyň çägine geçirmekdir. "Nikkei Asia" neşiriniň maglumatlaryna görä, bu ädim kompaniýanyň öz işini Donald Trampyň administrasiýasy tarapyndan girizilen import paçlaryndan goramak maksady bilen edilýär.
Döwrebaplaşdyrmagyň netijesinde, Tehasdaky önümçilik toplumynyň meýdany iki esseden gowrak artar — oňa goşmaça 232 müň inedördül metr meýdan goşular. Täze goýumlary hasaba alanyňda, Toyota-nyň 2003-nji ýyldan bäri bu meýdança eden umumy maýa goýumynyň möçberi 8,3 milliard dollara ýeter.
Enjamlaşdyryş we gurluşyk işleri dört ýyla niýetlenip, täzelenen önümçilik hataryny 2030-njy ýylda işe girizmek meýilleşdirilýär. Bu zawodyň ýyllyk kuwwatlygyny takmynan 150 000 ulag bilen artdyrmaga mümkinçilik berer. Deňeşdirmek üçin: 2025-nji ýylda San-Antoniodaky meýdança jemi 197 506 ulag (şol sanda "Tundra" pikaplary we "Sequoia" wnedorožnikleri) öndürdi.
Kuwwatlyklaryň giňeldilmegi 2000 sany täze iş ornuny döretmäge mümkinçilik berer. Häzirki wagtda zawodyň ştatynda 3700 işgär zähmet çekýär, şeýle hem göni Tehas toplumynyň çäginde ýerleşýän 23 sany awto-düzüm böleklerini üpjün edijisinde ýene 5600 adam işleýär.
Meksikadaky ýagdaý barada bolsa, Tihuana şäherindäki zawodda "Tacoma" ýygnamak işleri dolulygyna bes ediler. 2020-nji ýylda işe girizilen ikinji meksika meýdançasy Guanahuatoda bolsa önümçilik dowam eder, ýöne ol ýerde ýygnalan pikaplar mundan beýläk ABŞ bazaryna iberilmez.
