«Alpine» fransuz awtoulag öndürijisi «A110» benzinli sportkarlar maşgalasynyň önümçiliginiň tamamlanandygyny resmi taýdan yglan etdi. Dýeppe zawodynyň önümhanasyndan çykan iň soňky kupe «Bleu Alpine» firma gök reňkindäki «R 70» kysymly model boldy.
Indi brendiň hatary diňe elektrokarlardan ybarat bolar. Nesil çalşygy bilen bilelikde «A110» modeli hem elektrik hereketlendirijisine geçiriler. Täze elektrosportkaryň tanyşdyrylyşy 9-njy iýulda Gudwudda «Tizlik festiwalynyň» çäginde bolar.
Alpine markasy «A110» modelini 2017-nji ýylda ýeňil we gymmaty boýunça elýeterli sportkar hökmünde täzeden dikeltdi. Önümçilik döwründe kompaniýa şeýle awtoulaglaryň 30 müňe golaýyny öndürdi.
«A110-nyň» täze nesliniň «Renault 5 Turbo 3E» hot-hetçi bilen güýç elektrotehnikasynyň komponentlerini we platforma konsepsiýasyny paýlaşmagyna garaşylýar. Sportkaryň esasy modifikasiýasy yzky hereketlendirijini saklar, ýöne her teker üçin aýratyn elektrik hereketlendirijisini alar. Has güýçli we gymmat wersiýalar öňki okunda ýerleşdirilen üçünji hereketlendiriji bilen üpjün ediler.
Elektrik hereketlendirijisine doly geçilendigine garamazdan, kompaniýanyň ýolbaşçysy Filipp Krif mundan ozal täze model üçin işlenip düzülýän platformanyň nazary taýdan ýangyç güýç gurluşlaryny hem goldamaga ukyplydygyny aýdypdy. Onuň sözlerine görä, täze «Alpine A110» içinden ýandyrylýan hereketlendirijili modifikasiýany alyp biler. Ýöne bu diňe kanunçylykda garaşylmadyk üýtgeşmeler bolan ýagdaýynda ýa-da ýolbaşçylar benzinli wersiýanyň brende täze geljegi uly bazarlara ýol açjakdygyny göz ýetirseler amala aşar.
