Garyşyk söweş sungatynyň irlandiýaly wekili Konor Makgregor Las-Wegasda geçirilen "UFC 329" ýaryşynda amerikaly Maks Holloweýe garşy geçiren söweşi üçin azyndan 15 million dollar gazandy. Söweş bir minutdan sähel gowrak dowam etdi diýip, "Fansided" we "Sporting News" neşirleri habar berýär.
Makgregor üçin bu 2021-nji ýyldan bäri oktagona ilkinji gezek çykyşy boldy. Ol eýýäm söweşiň ilkinji sekuntlarynda aýagyndan şikes aldy. Tutluşyk başlan badyna ol garşydaşynyň üstüne ylgap, böküp, pyrlanyp aýagy bilen urmaga synanyşdy, ýöne boş geçdi. Sag aýagynyň üstüne düşende, dyzynyň bijaý düşendigi göründi.
Bir salymdan soň emin Maýk Beltran söweşi saklap, Maks Holloweýiň peýdasyna tehniki nokaut hasaba aldy.
Şikes barada dessine gürrüňler ýaýrady, çünki söweş başlamanka düşürilen wideoda Konoryň aýakgabyny çykaran wagty biraz agsaýandygy görünýärdi. Ýöne Makgregoryň özi söweşden öň näsazlyklaryň bardygyny düýbünden inkär etdi:
"Söweşden öň mende hiç hili şikes ýokdy. Hiç hili. Bu asla duýdansyz boldy. Men çuňňur umytsyzlykda. Men muny diňe dowzah diýip düşündirip bilýärin".
Guramaçylar gazançlar baradaky resmi maglumatlary beýan etmediler. UFC-niň ýolbaşçysy Dana Waýt öňler, bu söweş üçin tölegli ýaýlyma berişleri satmakdan gelýän tölegleriň ýoklugy sebäpli, täjirçilik geleşiginiň düýbünden täze formulasyny işläp düzmeli bolandygyny tassyklapdy.
Ýaryşdan bir gün öň, irlandiýaly türgeniň menejeri Odi Attar söweş barada "taryhy möçber" hakynda gürrüň gidýändigini aýdypdy. "MMAMania" portalyna beren sitatasyna görä, "bu UFC-däki islendik adamkydan, şol sanda "Zuffa Boxing"-iňkä garanyňda-da birnäçe esse köpdür". Belläp geçmeli zat, boksçy Konor Benn aprel aýyndaky "Zuffa" promouşnundaky söweşi üçin 15 million dollar alypdy.
"SalaryLeaks" çeşmesiniň maglumatyna görä, Makgregoryň Holloweý bilen duşuşygy üçin jemi girdejisi 32 million dollara ýetip biler (şundan 15 milliony kepillendirilen bölegidir). Şol bir wagtyň özünde, Holloweýiň mümkin bolan gazanjy 5 million dollara çenli bahalandyrylýar, munuň 3 milliony kepillendirilen hakdyr.
Konor Makgregor iki agram derejesinde UFC-niň öňki çempionydyr. MMA-da onuň hasabynda 22 ýeňiş we 7 ýeňliş bar, şol bir wagtyň özünde ol soňky bäş söweşiniň dördüsinde ýeňlişe sezewar boldy.
