Amerikanyň Birleşen Ştatlarynda futbol boýunça dünýä çempionaty dowam edýärkä, klublar boş durman, täze möwsümiň öňüsyrasynda düzümini güýçlendirmäge taýýarlyk görýärler. Ýewropanyň iň güýçli çempionatlarynyň klublary transferlere millionlarça ýewro sarp etmegi dowam etdirýärler. Biz iň soňky, has gymmat geçirilen transferler barada gürrüň berýäris.
Tilemans "Mançester Ýunaýtediň" eşigini geýdi
Angliýanyň "Mançester Ýunaýted" kluby 29 ýaşly ýarymgoragçy we Belgiýanyň milli ýygyndysynyň kapitany Ýuri Tilemansyň "Aston Willadan" transfer edilendigini resmi taýdan yglan etdi. Geleşik bäş ýyla — 2031-nji ýylyň iýun aýyna çenli hasaplanandyr.
Transfermarkt-yň maglumatyna görä, transferiň bahasy 42 million ýewro boldy (köpçülikleýin habar beriş serişdeleriniň maglumatlaryna görä, oýunçynyň Birmingem kluby bilen baglaşan şertnamasynda 35 million funt sterling töleg bellenilipdir). Tilemans "Mançester Ýunaýtediň" bir hepdede ýarymgoragçy Andreý Santosy we derwezeban Karl Darlowy satyn alandan soňky üçünji täze oýunçysy boldy.
Ýuri 2023-nji ýyldan bäri "Lesterden" erkin agent hökmünde "Aston Willa" geçip, şol ýerde çykyş edýärdi. Birmingem klubunda üç ýylda ol 134 oýna gatnaşdy. Geçen möwsümde belgiýaly oýunçy "Fraýburga" garşy final oýnunda ýeňiş getiren goly geçirip, toparyna Ýewropa ligasyny gazanmaga kömek etdi. Belgiýanyň milli ýygyndysynyň düzüminde ýarymgoragçy 90 oýna gatnaşyp, 15 gol geçirdi we 2018-nji ýyldaky Dünýä çempionatynyň bürünç medalynyň eýesi boldy. Häzirki dünýä çempionatynda Tilemans kapitanyň daňysyny geýip, çärýek finala çenli ýaryşa gatnaşyjylaryň arasynda iň uly aralygy (takmynan 62 km) ylgady, ýöne şikesi sebäpli Ispaniýa garşy çärýek final oýnuny (1:2) sypdyrdy.
Leandro Trossard Türkiýä göçýär
Londonyň "Arsenal" kluby belgiýaly oýunçysy Leandro Trossardy Stambulyň "Beşiktaş" klubuna satmak barada ylalaşandygyny resmi taýdan tassyklady. Klub 31 ýaşly futbolça lukmançylyk barlagyndan geçmek we resminamalary resmileşdirmek üçin Stambula gitmäge rugsat berdi. Türk tarapynyň oýunçy üçin 18 million ýewro we goşmaça 2 million ýewro bonus tölemegine garaşylýar.
Trossard 2023-nji ýylyň ýanwaryndan bäri "Braýtondan" bonuslary hasaba alanyňda 27 million funt sterlinge geçip, "kanonirleriň" düzüminde çykyş edýärdi. Jemi londonlylaryň düzüminde belgiýaly oýunçy 174 oýun geçirip, 36 gol urdy. Geçen möwsümde Leandro 50 duşuşykda 8 gol geçirip, 11 gezek gol geçirmäge kömek etdi, "Arsenal" bilen Premýer-ligany utdy we Mikel Artetanyň toparyna Çempionlar ligasynyň finalyna çykmaga ýardam berdi.
"Aston Willanyň" rekord satyn almagy
Tilemans bilen hoşlaşyp, "Aston Willa" dessine nemesleriň "Fraýburg" kluby bilen Şweýsariýanyň milli ýygyndysynyň täze ýyldyzy, 20 ýaşly ýarymgoragçy Ýoan Manzambiniň transferini ylalaşdy. Bonus tölegleri bilen bilelikde geleşigiň umumy bahasy 70 million ýewro töweregi bolar, bu bolsa "Fraýburgyň" taryhyndaky iň uly satuw bolar.
Sky Sport-yň maglumatyna görä, öňler nemes kluby şweýsariýaly oýunçyny 60 million ýewro "Nýukasla" geçirmek barada ylalaşypdy, ýöne oýunçynyň özi "Nýukasla" geçmäge razy bolmady. "Aston Willa" derrew herekete geçip, futbolçyny Birmingeme göçmäge yrmagy başardy. Indi diňe resminamalary çözmek galdy.
Karim Adeýemi "Barselona" goşuldy
"Barselonanyň" prezidenti Žoan Laporta 24 ýaşly nemes hüjümçisi Karim Adeýemini Dortmundyň "Borussiýa" klubundan satyn alandygyny tassyklady. Katalon kluby hüjümçi üçin 22 million ýewro töleýär, ýene 7 million ýewro bonus görnüşinde bellenilen.
"Biz örän şat, çünki biz Adeýemini uzak wagtdan bäri yzarlaýardyk. Ol örän çakgan, örän gowy hüjümçi. Klubumyzyň sport direktory Deku örän gowy iş etdi", — diýip Laporta teswir berdi.
Beýleki transferler barada gysgaça:
- Sandro Tonali ("Nýukasl" → "Tottenham"): italýan ýarymgoragçysy rekord möçberde 117 million ýewro londonlylara geçdi. Oýunçy öz watandaşy Roberto De Dzerbiniň ýolbaşçylygynda işlemegiň özüne çekendigini belledi.
- Mateuş Fernandeş ("West Hem" → "Tottenham"): portugaliýaly oýunçy talap edilýän 99 million ýewro "Tottenhamyň" düşelgesine geçdi. Oýunçy bilen gyzyklanan "Mançester Ýunaýted" bu bahany ýokary hasaplady.
- Luka Wuşkowiç ("Tottenham" → "Braýton"): horwatiýaly goragçy bir ýyl uzaltmak mümkinçiligi bilen bäş ýyllyk şertnama baglaşdy. Transferiň möçberi 46 million funt (€53,8 mln) boldy, bonuslar bilen bilelikde geleşik 50 million funtdan (€58,5 mln) geçer.
- Andreý Santos ("Çelsi" → "Mançester Ýunaýted"): transferiň möçberi 50 million funt sterling we braziliýaly oýunçynyň geljekki satuwyndan 10% boldy.
- Nataniýel Braun ("Aýntraht" → "Bawariýa"): 23 ýaşly çep goragçy 2031-nji ýylyň iýun aýyna çenli şertnama baglaşdy. Transferiň möçberi 55 million ýewro.
- Žeremi Monga ("Lester Siti" → "Mançester Siti"): 17 ýaşly oýunçy "Siti" bilen bäş ýyllyk şertnama baglaşdy (2031-nji ýylyň tomusyna çenli). Transferiň möçberi — 10 million funt (€11,7 mln) we 2,5 million funt (€2,9 mln) bonus.
- Meýson Grinwud ("Marsel" → "Fenerbahçe"): türk kluby transferi 42 million ýewro hem-de bonuslar bilen resmileşdirdi.
- Denzel Dumfris ("Inter" → "Real"): Niderlandlaryň milli ýygyndysynyň goragçysy 2030-njy ýyla çenli şertnama baglaşdy we Žoze Mourinýonyň toparynyň täze oýunçysy boldy. Madrid kluby 30 ýaşly oýunçy üçin 20 million ýewro töleýär.
Fran Garsiýa ("Real Madrid" → "Betis"): çep goragçy 2030-njy ýyla çenli şertnama baglaşyp, 4 million ýewra täze kluba geçdi. Madrid kluby oýunçynyň geljekki satuwynyň 50%-ni saklap galdy.- Eldor Şomurodow ("Roma" → "Istanbul Başakşehir"): türk kluby geçen möwsümde Türkiýe çempionatynyň iň gowy bombardiri bolan özbegistanly hüjümçiniň hukuklaryny 2,8 million ýewro satyn aldy.
- Natan Ake (erkin agent/ozalky "Mançester Siti" → "Fenerbahçe"): 31 ýaşly niderlandly goragçy türk kluby bilen şertnama baglaşdy we Awstriýadaky okuw-türgenleşik ýygnanyşygynda toparyna goşular. Şertnamanyň möhleti we maliýe detallary mälim edilmedi.
- Lesli Ugokuwu ("Býornli" → "Galatasaraý"): fransuz ýarymgoragçysynyň transferi türk tarapyna 30 million ýewro we bonuslara düşdi.
- Lýuka Din ("Aston Willa" → "PSŽ"): fransuz goragçysy 2013-nji ýyldan 2016-njy ýyla çenli çykyş eden Pariž klubuna gaýdyp gelýär. Geleşigiň möçberi 10 million ýewro.
