2026-njy ýyldaky futbol boýunça dünýä çempionatynyň final duşuşygy birinji we ikinji ýarymlaryň arasyndaky ägirt uly aýdym-saz şüweleňi (Halftime Show) özünde jemlär. The Telegraph neşiriniň habar bermegine görä,
FIFA öz düzgünlerine garşy gidip, oýun arasyndaky adaty 15 minutlyk arakesmäni 30 minuda çenli uzaldar.
Çempiony kesgitlejek duşuşyk 20-nji iýula geçilýän gije Nýu-Jersidäki «Metlaýf» (MetLife) stadionynda geçiriler.
Şüweleňi guramaçy hökmünde Coldplay toparynyň aýdymçysy Kris Martin bellenildi. Sahnada kanadaly aýdymçy Jastin Biber, amerikan pop-ýyldyzy Madonna, kolumbiýaly aýdymçy Şakira we Günorta Koreýanyň BTS topary ýaly dünýä meşhur ýyldyzlar çykyş ederler.
Mundan başga-da, final duşuşygy başlamazyndan öň tomaşaçylara 90 minutlyk ýapylyş dabarasy garaşýar. Bu dabara aktýor Tom Kruz, sazandalar Laura Pauzini, Nikol Şerzinger, Robbi Uilýams we bloger IShowSpeed gatnaşar.
Britaniýanyň BBC we ITV teleýaýlymlary eýýäm öz göni ýaýlym meýilnamalaryny ýarym sagatlyk arakesmä laýyklykda üýtgedip başladylar. Sungat işgärleriniň çykyşynyň özi bary-ýogy 11 minut dowam eder, ýöne guramaçylara futbol meýdançasynda sahnany çalt gurnamak we aýyrmak üçin goşmaça wagt gerek bolar. Telewideniýe işgärleri galan 15 minudy futbol bilermenleriniň gatnaşmagynda birinji ýarymyň adaty seljermesi üçin ulanmagy meýilleşdirýärler.
Şeýle usul Futbol assosiasiýalarynyň halkara geňeşiniň (IFAB) — ýagny oýun düzgünlerini kesgitleýän guramanyň düzgün-tertibini bozýar. Çünki olaryň düzgünleri boýunça oýun arasyndaky arakesme «15 minutdan aňry aşmaly däldir».
Ozal IFAB bu çäklendirmä berk eýerip gelipdi. 2021-nji ýylda geňeş Günorta Amerikanyň futbol konfederasiýasynyň (CONMEBOL) arakesmäni 25 minuda çenli uzaltmak baradaky haýyşyny ret edipdi we muny «oýunçylaryň saglygy we howpsuzlygy baradaky alada» bilen düşündiripdi we muňa meňzeş birnäçe ýagdaýlar bolup geçipdi. FIFA 2025-nji ýylda Nýu-Jerside geçirilen klublaryň arasyndaky dünýä çempionatynyň finalynda «Coldplay», «Doja Cat» we «Tems» toparynyň çykyşy üçin arakesmäni 25 minuda çenli uzaldypdy. Mundan başga-da, 2024-nji ýylda Amerika kubogynyň finalynda Şakiranyň konserti üçin CONMEBOL arakesme wagtyny 25 minuda çenli uzaldypdy.
