Halkara futbol federasiýasy (FIFA) 2026-njy ýylyň dünýä çempionatynyň final duşuşygy tamamlanan badyna bolup geçen uruş boýunça resmi tertip-düzgün derňewine başlady. Finalda Argentinanyň ýygyndysy goşmaça wagtda Ispaniýadan 0:1 hasabynda utulypdy.
Meýdançadaky waka argentinaly goragçy Nauel Molinanyň ýanyndan ylgap barýan ispanlaryň kapitany Rodrini urmagy bilen başlandy. Rodri dessine saklanyp, düşünişmek üçin oňa tarap ýöredi.
Ispan goragçysy Erik Garsiýa öz kapitanynyň tarapyny tutmak we oýunçylary aralamak üçin ylgap geldi. Şol pursatda çaknyşyga Argentinanyň ýygyndysynyň ýarymgoragçysy Leandro Paredes hem goşuldy. Ol agressiw ýagdaýda Erik Garsiýanyň bokurdagyndan tutdy, soňra bolsa ýanyna ylgap gelen Gawini ýere ýykdy.
Mundan başga-da, Argentinanyň ýygyndysynyň tälimçiler ştabynyň agzasy Roberto Aýýalanyň ispan ýarym goragçysy Dani Olmony urjak bolan pursaty hem FIFA-nyň ünsüni çekdi.
Oýundan soň birnäçe köpçülikleýin habar serişdelerinde FIFA-nyň Leandro Paredesiň gyzyl kartyny ýatyrandygy we duşuşygyň protokolyndan bu baradaky ýazgyny aýyrandygy barada galp maglumat ýaýrady. Ýöne duşuşygyň emin agzasy Slawko Winçiçiň hakykatda oňa gyzyl kart görkezmändigi belli boldy.
Bu bulaşyklyk teswirçiler üçin niýetlenen tehniki ýaýlym ulgamyndaky we teswirnamadaky ýalňyşlygyň netijesinde ýüze çykdy, sebäbi ol ýere ilkibaşda gyzyl kart alnandygy barada ýazgy girizilipdir. Soňra bu ýazgy eminiň resmi raportyna laýyk getirmek üçin aýryldy, sebäbi eminiň raportynda Paredesiň diňe oýnuň esasy wagtynda alan «sary kartoçkasy» bardy.
Muňa garamazdan, bu ýagdaý oýunçylary jogapkärçilikden boşatmaýar. FIFA-nyň Tertip-düzgün komiteti dawanyň wideoýazgylaryny öwrenmek üçin etika boýunça ýörite prokurory belledi.
Paredesiň hereketleri wideokameralara düşenligi sebäpli, futbolça milli ýygyndynyň resmi duşuşyklarynda birnäçe aýlyk diskwalifikasiýa etmek howpy abanýar. Şeýle hem sanksiýalar Molina we tälimçiniň kömekçisi Aýýala garşy ulanylyp bilner.
Argentinalylar üç gezek dünýä çempionydyr. Olar DÇ-1978-iň finalynda Niderlandlary, DÇ-1986-da GFR-i we DÇ-2022-de Fransiýany utupdy. Mundan başga-da, Argentina dört gezek dünýä birinjiliginiň kümüş baýragynyň eýesi boldy.
