Absolýut söweş çempionatynyň (UFC) ozalky çempiony, irlandiýaly Konor Makgregor amerikaly Maks Holloweýe garşy tutluşykda alan şikesi sebäpli bir ýyl söweşlerden çekildi. Bu barada metbugat maslahatynda promouşeniň prezidenti Dana Waýt habar berdi.
«Makgregor uruşlardan bir ýyllyk çykdy» – diýip, ol belledi.
Ýatlap geçsek, Makgregor Las-Wegasda (Newada ştaty, ABŞ) geçirilen UFC ýaryşynda Holloweýden ýeňlipdi. Irlandiýaly türgen 65 sekuntyň içinde tehniki nokaut bilen ýeňlişe sezewar boldy, ilkinji sekuntlarda ol dyzyndan şikes aldy, şol sebäpli hem söweşi dowam etdirip bilmedi. Tutluşykdan soň Waýt Makgregoryň dyzynyň öňdäki atanak şekilli bogun damaryna şikes ýetendigini mälim etdi. Söweşiji sosial torlarda özüne operasiýa garaşýandygyny aýtdy, soňra bolsa Holloweý bilen bolan tutluşygy geçirilmedik diýip ykrar etmäge çagyrdy.
Makgregor 37 ýaşynda, onuň hasabynda garyşyk başa-baş söweşlerde 22 ýeňiş we 7 ýeňliş bar. Ozal ol ýeňil we ýarym ýeňil agram kategoriýalarynda UFC-niň çempionlyk guşaklaryna eýe bolupdy. 2024-nji ýylyň iýunynda irlandiýaly türgen amerikaly Maýkl Çendler bilen tutluşyk geçirmelidi, ýöne söweşe taýýarlyk görýän wagty Makgregoryň aýak barmagynyň döwülmegi sebäpli tutluşyk ýatyryldy. 2021-nji ýylyň iýulynda amerikaly Dastin Porýe garşy geçirilen ozalky söweşinde irlandiýaly türgen aýagyny döwdüripdi.
