Alibaba wideo döretmek üçin niýetlenen Wan3.0 atly täze emeli aň modelini köpçülige hödürledi. Ol 1080p durulygynda 30 sekunda çenli wideo ýasap bilýär. Bu bolsa, ondan öňki Wan2.7-niň wideolaryndan iki esse uzyndyr.
Köpçülige hödürlenmezden öň Wan3.0 birnäçe günläp Alibaba Cloud we Qwen Cloud platformalarynda synagdan geçirildi. Öndürijiler modeliň tutuş wideonyň dowamynda gahrymanlaryň ownuk-uşak taraplaryndan başlap, giňişligi sazlamagy we animasiýa elementlerini ýerbe-ýer saklamagy oňarýandygyny aýdýarlar. Şeýle hem ony dürli dillerde seslendirmek mümkinçiligi bar.
Wan3.0-yň esasy aýratynlyklarynyň biri — maglumatlary dürli görnüşde kabul edip bilmegidir. Täze model ýazgy, surat, ses we wideodan başga-da, web-sahypalar hem-de resminamalar, şol sanda PDF we PowerPoint bukjalary bilen hem işläp bilýär. Eger ulanyjy haýsydyr bir taslama tanyşdyrylyşyny ýa-da elektron jedweli oňa ýüklese, şol nusga esaslanýan wideony ýasadyp biler.
Alibaba Wan3.0 modelini diňe bir sosial torlary üçin kontent döretmekde däl, eýsem marketing çärelerinde, korporatiw aragatnaşyklarda, şeýle hem awtonom ulaglar we robototehnika ulgamynda simulýasiýa okuwlary üçin hem ulanyp bolýar.
Bahasy taýýar wideonyň hiline baglydyr:
- 480p wideonyň bir sekundy: 0,05 dollar;
- 720p wideonyň bir sekundy: 0,1 dollar;
- 1080p wideonyň bir sekundy: 0,2 dollar.
Şunlukda, iň ýokary durulykdaky bir minutlyk wideo 12 dollara düşýär.
Wan3.0-yň hödürlenýän wagty Alibaba kompaniýasynyň Gonkong gazna biržasynda paýnamalary ýerleşdirmek arkaly takmynan $10,2 mlrd maýa çeken pursadynyň yz ýanyna gabat geldi.
