Apple kompaniýasynyň baş direktory Tim Kuk kompaniýanyň Nepalda we Tibetde bolup geçen sil joşgunyndan hem-de süýşgünden ejir çekenlere kömek üçin serişde bölüp berjekdigini mälim etdi. Bu barada MacRumors neşiri habar berýär.
Apple soňky iki aýdan gowrak wagtyň dowamynda tebigy betbagtçylyklardan ejir çekenlere 5-nji gezek hemaýat kömegini berýär. Mundan öň kompaniýa Indoneziýadaky, Wenesueladaky, Günorta Ýewropadaky we Ýaponiýadaky ýertitremelerden soňky dikeldiş işlerine goldaw beripdi.
Nepalyň maliýe ministri Swarnim Wagleniň maglumatyna görä, ýurduň infrastrukturasyny dikeltmek üçin 4-5 milliard dollar gerek bolar. Heläkçiligiň netijelerini aradan aýyrmak we ejir çekenlere goldaw bermek üçin Nepala ençeme ýurtdan we guramalardan ynsanperwer kömegi gelip gowuşýar. Hususan-da, ABŞ 3,6 million dollardan gowrak, Kanada 5 million dollar, BMG 2 million dollar we Bütindünýä banky 1,3 million dollar serişde bölüp berýärler. Mundan başga-da, Hindistan 37 tonnadan gowrak ynsanperwer ýüküni ugratdy, Beýik Britaniýa, Günorta Koreýa we Şweýsariýa hem öz kömeklerini berdiler.
Sişenbe güni Gimalaý buzlugynyň bir bölegi opurylyp, derýanyň akymyny wagtlaýyn bökdedi. Şondan soň emele gelen güýçli suw we batgaly sil akymy aşaky ilatly ýerleriň üstüne indi. Ýerli häkimiýetleriň berýän maglumatyna görä, Nepalda azyndan 734 adam pida boldy, 2,4 müňden gowrak adam bolsa dereksiz ýiten hasaplanylýar.
Nepalyň we Tibetiň serhet ýakasyndaky ýollar, köprüler we ýaşaýyş jaýlary weýran boldy. Nepalyň syýahatçylyk müdirligi dereksiz ýitenleriň 320-siniň daşary ýurt raýatydygyny belleýär. Halas ediş işleri henizem dowam edýär.
Tibetde resmi taýdan 16 adamyň heläk bolandygy we 546 adamyň yzsyz-sorsuz ýitendigi mälim edildi. Şol bir wagtyň özünde, maglumatlaryň çäkliligi sebäpli ol ýerdäki tebigy betbagtçylygyň ýetiren zyýanynyň hakyky möçberini kesgitlemek kyn düşýär.
Hytaýly resmiler hem daşgyn sebäpli emele gelen we hanasyndan agmak gorkusyny döreden kölüň suwunyň häzirki wagtda peselip başlandygyny habar berdiler.
