39 ýaşly Lionel Messi Argentinanyň milli ýygyndysyndaky çykyşlaryny tamamlaýandygyny yglan etdi. Ol bu barada Instagramdaky sahypasynda habar berdi.
Messi dünýä çempionatynyň finalynda Ispaniýa garşy oýunda ýeňlenden soň milli ýygyndyda oýnamagy dowam etdirmek ýa etdirmezlik hakda kän oýlanandygyny we ahyrsoňy karýerasyny tamamlamak kararyna gelendigini aýtdy.
«Bu meniň üçin juda çökder hem-de henizem yzaly çözgüt boldy, ýöne indi wagtyň gelendigine düşünýän. Hudaý kessin, men elmydama oýna bar durkum bilen berildim — diňe soňky ýyllarda hemme ýerde ýeňiş gazanan döwrümizde däl, ondan öň hem şeýle. Men bu köýnekçe üçin, size şatlyk getirmek, futbol arkaly argentinalydygyňyza buýsanmagyňyzy gazanmak üçin hemişe göreşdim hem-de 100 göterim güýjümi sarp etdim», — diýip, Argentinanyň milli ýygyndysynyň kapitany gürrüň berdi.
Ol milli ýygyndydan «kalby rahat we buýsanç bilen» gidýändigini ýaňzytdy. Messi topardaşlary bilen birlikde janköýerlere arzuwlanýan günleri sowgat edip bilendiklerine guwanýandygyny belledi.
«Bularyň ählisini siziň bilen bilelikde başdan geçirmek telbelik ýaly bir zatdy. Men sizi ýürekden söýýän!» — diýip, futbolçy hatynda ähli janköýerlerine ýüzlendi.
Messi bu haty dünýä çempionatynyň finalyndan iki gün soň, 21-nji iýulda ýazandygyny hem boýun aldy, ýöne kakasy bilen «bolan ýagdaýdan soň» bu pikiriniň has-da berkändigini aýtdy.
Awgust aýynyň başynda Messiniň kakasy Horhe uzak wagtlap dowam eden keselden soň 68 ýaşynda aradan çykypdy.
Lionel Messi Argentinanyň milli ýygyndysynda 2005-nji ýyldan bäri çykyş edýärdi. Ol milli ýygyndynyň düzüminde 2022-nji ýylda dünýä çempiony boldy, 2021 we 2024-nji ýyllarda Amerikanyň Kubogyny gazandy. Mundan başga-da ol 2022-nji ýylda Finalissimada ýeňiş gazanypdy.
Messi milli ýygyndyda 207 duşuşyk geçirip, 125 gol geçirdi. Bu milli ýygyndylaryň derejesinde taryhdaky iň ýokary netijeleriň biridir. Ondan öňde diňe Portugaliýanyň milli ýygyndysynda 233 oýunda 146 gol geçiren Kriştiano Ronaldo bar.
Messi 2016-njy ýylda hem Argentinanyň milli ýygyndysyndaky karýerasyny tamamlaýandygyny yglan edipdi. Şol wagt ol milli topar bilen ýeňiş gazanyp bilmändigini sebäpleriň biri hökmünde görkezipdi. Emma kän wagt geçmänkä milli ýygyndynyň düzüminde çykyşlaryny täzeden dowam etdirdi.
Häzirki wagtda Messi ABŞ-nyň MLS çempionatyndaky «Inter Maýami» klubynda oýnaýar.
