Beýik Britaniýanyň hökümeti ýurduň ýaşaýjylaryna öýlerinde azyndan üç güne ýetjek agyz suwy we uzak wagtlap zaýalanmaýan azyk önümleriniň ätiýaçlygyny saklamagy maslahat berdi. Bu maslahat ilaty adatdan daşary ýagdaýlara taýýarlamaga gönükdirilen «Be Ready» («Taýýar bol») atly täze maksatnamanyň bir bölegidir.
Maksatnamanyň başlamagyna tomusky yssy howa, gurakçylyk, tokaý ýangynlary, şeýle-de PHP programmirleme dilinde ýüze çykarylan howply kemçilik bilen bagly ýaňy-ýakynda dörän tehniki näsazlyk itergi berdi. Çarşenbe güni ýüze çykarylan kemçilik zerarly hökümet käbir hyzmatlaryň işiniň wagtlaýyn kesmeli boldy, ol köp sanly haker hüjümlerine getirdi.
Premýer-ministr Endi Börnem ýurduň çökgünlige köplenç diňe ol ýüze çykandan soň çäre görmek bilen çäklenendigini aýtdy. Onuň pikiriçe, indi adatdan daşary ýagdaýlara öňünden taýýarlyk görmek meselesine has köp üns berilmelidir.
Täze maksatnamanyň çäginde Beýik Britaniýanyň hökümet başlygy tokaý ýangynlaryna garşy göreşmek boýunça ýygnak geçirdi we degişli çäreleriň meýilnamasyny hödürledi. Onda, hususan-da, ody söndürmek üçin harby uçarlardan peýdalanmak göz öňünde tutulýar.
Goranmak ministri Wes Striting ýaňy-ýakynda ýüze çykan tehniki näsazlyga meňzeş kiberhadysalaryň geljekde has ýygy bolup biljekdigini duýdurdy. Onuň aýtmagyna görä, emeli aňyň ösmegi adaty gorag ulgamlaryny ýeňip geçmegi aňsatlaşdyrýar. Ministr beýleki howplaryň hatarynda duşmançylykly döwletleriň hereketlerini, guramaçylykly jenaýatçylygy we howanyň üýtgemegini hem görkezdi.
Beýik Britaniýanyň täze teklipleri Ýewropa Komissiýasynyň geçen ýylky başlangyjy bilen hem utgaşýar. Komissiýa şonda Ýewropa Bileleşigine agza ýurtlaryň ýaşaýjylaryny adatdan daşary ýagdaýlar üçin niýetläp, 72 sagatlap ýeterlik boljak öý ätiýaçlyk toplumyny taýýarlamaga çagyrdy. Şeýle toplumyň düzümine azyk önümlerini, agyz suwuny, nagt pullary we göçme zarýad beriji enjamlary goşmak maslahat berlipdi.
