JerryRigEverything YouTube kanalynyň blogeri Zak Nelson Trump Mobile T1 smartfonynyň berkligini barlady we ony doly söküp gördi. Synaglar iFixit-iň hünärmenleriniň çykaran netijelerini doly tassyklady: ozal «Made in USA», häzir bolsa «Proudly American» diýlip hödürlenýän bu enjam 2024-nji ýyldan bäri çykarylmaýan HTC U24 Pro modeliniň diňe reňki çalşylan nusgasydyr.
Synagyň esasy netijeleri:
Smartfonyň gurluşy: Trump Mobile T1 we HTC U24 Pro smartfonlarynyň düzüm bölekleriniň hemmesi diýen ýaly, şeýle-de häsiýetnamalary, platalary, kameralarynyň ýerleşişi we olaryň interfeýsleri birmeňzeş.
Korpusyň we daşky bezegiň hili: «Altyn» reňkli plastik korpus we onuň gapdal gyralary aňsatlyk bilen çyzylýar. Arka panelinde şekillendirilen ABŞ-nyň baýdagynda bolsa ýalňyşlyk bar — döwleti esaslandyran ştatlary aňladýan 13 zolagyň deregine onda 11-isi çekilipdir.
Displeýiň durnuklylygy: Enjamyň ekrany döwrebap smartfonlar üçin kanagatlanarly netijeleri görkezdi: gural arkaly çyzyklar Moos şkalasy boýunça 6-njy derejede, has çuň zeperler bolsa 7-nji derejede peýda boldy. Displeý oduň täsirine-de çydamly bolup çykdy.
Şeýle-de Zak Nelson smartfony gaňyrmaga synanyşdy — korpus durnuklylygyny saklady. Ýöne bloger muny Trampyň zähmeti däl-de, eýýäm smartfon bazaryndan giden HTC-niň işiniň netijesidigini belleýär.
Wideonyň dowamynda bloger smartfony söküp, onuň içki gurluşyny HTC U24 Pro bilen deňeşdirdi. Şeýle-de ol enjamlaryň böleklerini hem özara çalşyp gördi. Görnüşi ýaly, smartfonlaryň düzüm bölekleri biri-birine doly gabat geldi.
Synaglaryň netijeleri boýunça, JerryRigEverything gajetiň doly hytaý komponentlerinden ýasalandygyny, şeýle-de berklik we häsiýetnamalary taýdan, hatda orta elýeterli modellerden hem pesde durýandygyny tassyklady.
Muňa garamazdan, ýakynda aşa ýokary isleg sebäpli, Trump Mobile T1-iň bahasy 749 dollara çenli gymmatlady. Satuwyň başynda ol 499 dollardy.
