Amerikanyň Birleşen Ştatlarynda täze awtomobil satyn almak boýunça şertnamanyň ortaça bahasy rekord derejä — 51 974 dollara ýetdi. Muny Catalyst IQ guramasynyň berýän maglumatlary delillendirýär.
Mundan öňki iň ýokary görkeziji 2026-njy ýylyň 26-njy iýunynda, ýagny Catalyst IQ Vehicle Price and Inventory Tracker indeksi 51 820 dollara ýetip, 2023-nji ýylyň iýulyndaky rekorddan bir dollar ýokary geçen wagty hasaba alnypdy. Aradan bary-ýogy dört gün geçenden soň bolsa, bu görkeziji täze taryhy iň ýokary derejä — 51 974 dollara ýetdi.
Ýylyň dowamynda bahalaryň has uly ösüşi orta göwrümli premium krossowerleriň we SUV-laryň segmentinde hasaba alyndy, bu ýerde ortaça baha 3 204 dollar ýokarlandy. Uly göwrümli pikaplar 2 296 dollar, köpçülikleýin orta göwrümli krossowerler 952 dollar gymmatlady, sedanlaryň bahasyna bolsa bary-ýogy 262 dollar goşuldy.
Şol bir wagtda awtoulaglaryň käbir aýratyn görnüşleri has arzanlady. Kabrioletleriň bahasy 9,8%, miniwenleriňki bolsa 3,2% aşak düşdi. Şeýle hem uly göwrümli SUV-laryň, iri lýuks ýolsuzlyk ulaglarynyň we premium wenleriň nyrhlary peseldi.
Catalyst IQ guramasynyň maglumatyna görä, awtoulaglaryň bahasyna önümçilik we logistika zynjyrlaryndaky üýtgeşmeler täsir edýär. Awtoöndürijiler käbir modelleriň çykyşyny Demirgazyk Amerikanyň bazaryna golaý ýerlere geçirýär ýa-da önümçilik meýdançalaryny üýtgedýär, bu bolsa goşmaça çykdajylara getirýär.
Bahalaryň rekord derejede gymmatlamagyna garamazdan, täze awtoulaglara bolan isleg ýokary bolmagynda galýar. Bilermenleriň bellemegine görä, awtoulaglar has çalt satylýar, dilerler we öndürijiler bolsa heniz alyjylaryň gyzyklanmasynyň peselmegi bilen ýüzbe-ýüz bolmady. Şol sebäpli ýakyn wagtda bazarda uly möçberli arzanladyşlaryň bolmagyna garaşylmaýar.
