Mýunheniň häkimiýetleri ýagyn ýetmezçiligi we aşa ýokary temperatura sebäpli döräp, uzaga çeken gurakçylyk hem-de suw gytçylygy howpy bilen ýüzbe-ýüz boldular.
Şu sebäpli Klimat meseleleri boýunça departament agyz suwuny ulanmaga dessin çäklendirmeleri girizýän ýörite buýruk çykardy diýip, Sýuddeutsche Zeitung (SZ) gazeti habar berýär.
Bu çäreler azyndan 1-nji awgusta çenli güýjünde galar we olaryň möhletiniň uzaldylmagy mümkindir.
Nämelere gadagançylyk girizildi?
Täze düzgünler ilatyň we kärhanalaryň suw sarp edişini berk kadalaşdyrýar.
- Indi şahsy howuzlary we suwa düşmek üçin niýetlenen islendik başga göwrümli gaplary agyz suwy bilen doldurmak bütinleý gadagan edildi.
- Sagat 09:00-dan 19:00-a çenli baglary, şahsy gazonlary we beýleki ýaşyl zolaklary suwarmak gadagan edilýär. Diňe oba hojalyk ýerleri, gonamçylyklar we sport meýdançalary üçin kadadan çykma ýagdaýy göz öňünde tutuldy.
- Awtoulaglary ýöriteleşdirilmedik meýdançalarda ýuwmak gadagan edildi (ulaglary diňe awtoýuwujy kärhanalarda ýuwmaga rugsat berilýär).
Şu wagta çenli Bawariýanyň günorta bölegi ýeterlik mukdarda ýagyş ýagýan we suw üpjünçiligi ygtybarly bolan sebit hasaplanýardy. Emma iýun aýynyň ahyrynda ober-burgomistr Dominik Krauze we SWM jemgyýetçilik gullugy tarapyndan suwy tygşytlamaga çagyran meýletin çykyşlar netije bermedi. Adaty günlerde gije-gündizki ortaça sarp ediş mukdary 300–350 million litr bolan bolsa, iýundaky aşa gyzyklar döwründe bu görkeziji günde 400 million litrden geçdi.
Mundan öň şäher häkimiýetleri çüwdürimleriň bir bölegini öçüripdiler, gulluk ulaglaryny ýuwmagy we binalaryň fasadlaryny arassalamagy wagtlaýyn saklapdylar, şeýle hem ýaşaýjylardan hammam deregine duş kabul etmeklerini haýyş edipdiler. Eýýäm 30-njy iýunda burgomistr eger ýagdaý üýtgemese, çäreleriň has-da berkdiljekdigini duýdurypdy.
Mýunhendäki ýagdaý Ýewropadaky umumy klimat üýtgemesiniň täsirinde ýüze çykýar. Iýun aýynyň ahyrynda Günbatar Ýewropa ýurtlarynda temperatura 40 gradusdan geçipdi. Ýewropanyň Ýer şaryna gözegçilik edýän «Copernicus» gullugynyň maglumatlaryna görä, geçen iýun aýy Ýer ýüzüniň gury ýeriniň ortaça temperaturasy 20,74 gradus bolmak bilen, meteorologik gözegçilikleriň tutuş taryhynda resmi taýdan iň yssy iýun aýy boldy.
