Apple amerikan korporasiýasy bazar kapitalizasiýasy boýunça Nvidia kompaniýasyndan öňe geçip, ýene-de dünýäniň iň gymmat kompaniýasy boldy. Muny söwda maglumatlary delillendirýär.
Nasdaq biržasynda Apple-iň paýnamalarynyň bahasy bir gymmatly kagyz üçin 334,03 dollara çenli ýokarlandy, şol bir wagtda Nvidia-nyň kagyzlary 4,37% peselip, 198,34 dollara düşdi. Netijede, Apple-iň bazar bahasy 4,9 trillion dollara ýetdi.
Kapitalizasiýasy 4,83 trillion dollar bolan Nvidia ikinji orny eýeledi. Üçünji ýerde bolsa 4,19 trillion dollar görkeziji bilen Google-yň baş kompaniýasy Alphabet ýerleşdi.
Bloomberg agentliginiň maglumatlaryna görä, Apple-iň birinji orna dolanmagyna maýa goýumlaryň tehnologiýa pudagyndan yza çekilmegi ýardam etdi. Munuň esasy sebäpleriniň biri, Nvidia-nyň çiplerini ulanýan OpenAI we Anthropic kompaniýalarynyň işläp taýýarlamalaryna bäsdeş hasaplanýan Moonshot AI hytaý startapy täze emeli aň modelini çykarandan soň, Nvidia-nyň paýnamalarynyň bahasynyň peselmegidir.
Apple bazar kapitalizasiýasy boýunça ilkinji gezek 2011-nji ýylyň awgustynda dünýäniň iň gymmat kompaniýasy bolupdy. 2016-nji ýylda öňdelik gysga wagtlyk Alphabet kompaniýasyna geçdi. 2018-nji ýylyň awgustynda bolsa Apple açyk kompaniýalaryň arasynda ilkinji bolup 1 trillion dollar bazar bahasyndan geçmegi başardy.
2024-nji ýylda emeli aň üçin çözgütlere bolan ýokary islegiň netijesinde birinji orny Nvidia eýeläpdi.
