Braziliýanyň prezidentligine dalaşgär Flawiu Bolsonaro, eger-de oktýabr aýynda geçiriljek saýlawlarda ýeňiş gazansa, girdejisi az zenanlary mugt smartfon we internet ulgamy bilen üpjün etjekdigini mälim etdi.
Syýasatçynyň aýtmagyna görä, onuň topary bu maksatnama gatnaşmaga gyzyklanma bildirýän ykjam aragatnaşyk operatorlary bilen eýýäm gepleşikleri geçirdi.
– Biz 70 million zenany aragatnaşyk bilen üpjün etmekde hökümete kömek etmäge örän uly gyzyklanma bildiren ykjam aragatnaşyk operatorlary bilen eýýäm gepleşik geçirdik. Saýlaw öňüsi kampaniýamyzyň çäginde, telefon satyn almaga gurby çatmaýan adamlara ykjam telefonlaryň özlerini mugt bermek meselesini ara alyp maslahatlaşýarys – diýip, dalaşgär X sosial ulgamyndaky wideoýüzlenmesinde aýtdy.
Bolsonaronyň saýlaw ştabyndan habar berilşi ýaly, bu başlangyç zenanlaryň uzak aralykdan (onlaýn) bilim almaklary, iş tapmaklary, öz şahsy biznesini ösdürmekleri we maşgala zulumy ýüze çykanda ýagdaý barada habar bermekleri üçin göz öňünde tutulandyr. Şeýle-de bolsa, syýasatçy bu taslamanyň haýsy çeşmelerden maliýeleşdiriljekdigini anyk düşündirmedi.
Braziliýanyň köpçülikleýin habar serişdeleriniň hasaplamalaryna laýyklykda, bahasy takmynan 700 real (125 dollar töweregi) bolan iň ýönekeý smartfonlary diňe häzirki wagtda hereket edýän durmuş maksatnamalaryna gatnaşýan 28,7 million zenan üçin satyn almak hem 20 milliard realdan-da (3,8 milliard dollar töweregi) gymmada düşer. Bu görkezilen mukdara ykjam internet üçin ediljek çykdajylar hasaplanylmadyk ýagdaýynda şeýledir.
Braziliýada prezident saýlawlary oktýabr aýynda geçiriler. Bu saýlawlara gatnaşjakdygyny ýurduň häzirki başda duran prezidenti Luis Inasiu Lula da Silwa eýýäm resmi taýdan yglan etdi. Rio-de-Žaneýro ştatynyň senatory Flawiu Bolsonaronyň (ýurduň öňki prezidenti Žair Bolsonaronyň ogly) bolsa onuň esasy bäsdeşi bolmagyna garaşylýar.
