5-nji awgustda Hytaýyň Haýýan-Gündogar kosmodromyndan «Szelun-3» göteriji raketasy arkaly Özbegistanyň wekilleriniň gatnaşmagynda döredilen «Samarkant-2028» atly ilkinji emeli hemra orbita üstünlikli çykaryldy.
Bu giperspektral hemra Hytaýyň StarVision kompaniýasy tarapyndan döredilip, oňa «Özbekkosmos» agentliginiň hünärmenleri tarapyndan emeli aň moduly gurnaldy. Ol maglumatlaryň bir bölegini işläp, Ýere eýýäm «taýýar» netijäni ugradar.
Emeli hemranyň ady 2028-nji ýylda Samarkantda geçiriljek 79-njy Halkara astronawtika kongresi mynasybetli dakyldy.
«Samarkant-2028» oba hojalygyna, ekologiýa, suw serişdelerine hem-de şäher gurluşygyna gözegçilik etmäge mümkinçilik berer, ýöne onuň esasy maksady pagtanyň ösdürilip ýetişdirilişine gözegçilik etmekden ybarat.
«Iň esasy zat, bu missiýa — orbita nobatdaky emeli hemrany çykarmak bilen çäklenmeýär. Bu Özbegistanyň kosmos tehnologiýalaryny döretmekde, kosmosda emeli aňy peýdalanmakda we kosmos tehnikasynyň milli güýjüni emele getirmekde täze tapgyra girýändiginiň alamatydyr» — diýip, «Özbekkosmos» agentligi belleýär.
