15-nji awgustda irden Indoneziýanyň gündogaryndaky Flores adasynyň kenarynda 7,7 bal güýjünde ýertitreme boldy. Bu barada DW neşiri habar berýär.
Ýertitreme ýerli wagt bilen sagat 05:58-de (WITA) hasaba alyndy. Ýertitremäniň merkezi Flores deňzinde, Ende şäherinden (Gündogar Nusa-Tengara welaýaty) takmynan 68 kilometr demirgazyk-günbatarda ýerleşýär. Seýsmologlaryň çaklamalaryna görä, onuň ojagy 15 kilometr çuňlukda ýerleşýärdi.
Reuters agentliginiň maglumatyna görä, azyndan 5 adamyň heläk bolandygy resmi taýdan tassyklanyldy, başga-da birnäçe adam ýaralandy. Maumere we Ruteng ýaly kenarýaka şäherlerinde binalara, mekdeplere, hassahanalara we port infrastrukturasyna uly zyýan ýetdi.
Ýertitremäniň yzysüre Indoneziýanyň meteorologiýa, klimatologiýa we geofizika agentligi (BMKG) sunami duýduryşyny yglan etdi, tolkunlaryň beýikliginiň 3 metre ýetmegi mümkin. Käbir ýerlerde güýçli yza çekilýän tolkunlary görüp, belentliklere tarap köpçülikleýin ewakuasiýa başladylar. Takmynan üç sagat geçensoň, kiçi tolkunlar (19-30 sm) hasaba alnyp, sunami duýduryşy resmi taýdan ýatyryldy.
Ýertitremäniň yzýany sebitde 6,1 bal güýjüne ýetýän aftorşaklar gaýtalandy. Häkimiýetler jaýlaryň ýykylmak howpy sebäpli ýerli ýaşaýjylara wagtlaýynça zeper ýeten öýlere dolanmazlygy maslahat berýärler. Halas ediş gulluklary ýeten zyýanyň möçberini kesgitleýärler.
