Bütindünýä saglygy goraýyş guramasy (BSGG) Ugandada 42 günüň dowamynda hiç hili täze kesel alamatlarynyň hasaba alynmanlygyny nazarda tutup, ýurdy Eboladan azat diýip yglan etdi.
Epidemiýa döwründe jemi 20 adamda kesel ýüze çykaryldy, olaryň hemmesi diýen ýaly, goňşy Kongo Demokratik Respublikasyndan gelen eken. Ýokanç degen hassalaryň ikisi aradan çykdy.
«Ugandada 16-njy iýulda Ebola bilen keselländigi tassyklanan syrkawyň hassahanadan çykarylanyna 42 gün geçdi. Soň bu ýagdaý bilen baglanyşykly ýokanç alamatlary ýüze çykarylmady. Bu bolsa epidemiýanyň tamamlanandygyny aňladýar» diýip, guramanyň X platformasyndakaty sahypasynda habar berilýär.
BSGG şeýle hem hökümetiň, lukmanlaryň we olaryň hyzmatdaşlarynyň epidemiýany saklamak we onuň mundan beýläk ýaýramagynyň öňüni almak üçin gören çärelerine ýokary baha berdi.
«Biz töwekgelçiliklere, ýokanjyň ýurduň içine aralaşyşynyň yzygiderliligine we hereketine baha bermek arkaly, Eboladan azatdygymyza göz ýetirdik. Ýöne bellenilen düzgün-talaplara görä, BSGG muny yglan etmek üçin biraz garaşmaly boldy» diýip, Ugandanyň Saglygy goraýyş ministrliginiň hemişelik sekretary Diana Atwin NTV teleýaýlymyna beren söhbetdeşliginde aýtdy.
Şonuň ýaly-da, Atwin epidemiýa döwründe Uganda syýahat etmek boýunça çäklendirme girizen ýurtlara indi bu gadagançylykdan ýüz öwürmäge çagyrdy:
«Eger olarda başga sebäpler ýok bolsa, olar ýurdumyzyň üstündäki çäklendirmeleri gürrüňsiz aýyrmalydyr, ugandalylar islän ýurduna arkaýyn gidip-gelip bilmelidir».
Uganda şeýle hem Kongo DR-de Ebola bejeriş merkezleriniň ýene ikisini açmak meýilnamasyny yglan etdi. Indi olaryň umumy sany dörde ýeter.
15-nji maýda epidemiýa yglan edileli bäri, Kongo DR-de 5600-den gowrak kişiniň ýokançlyga uçrandygy tassyklandy, olaryň 2700-den gowragy kesel zerarly aradan çykdy. Bu taryhda iň çalt ýaýraýan epidemiýa hasaplanýar.
