Madridiň «Real» kluby «Formula-1» çempionatynyň Ispaniýanyň Gran-prisi tapgyrynyň hemaýatkäri boldy. Bu barada guramaçylaryň beýanatyna salgylanyp, «Marca» neşiri habar berýär.
Klub 11–13-nji sentýabr aralygynda Madridiň etegindäki täze «Madring» ýolunda ilkinji gezek geçiriljek ýaryşyň ýerli hyzmatdaşy derejesini aldy. Ispaniýanyň Gran-prisi şu ýyl Barselonadan Ispaniýanyň paýtagtyna göçürildi.
Beýanatda bellenilişi ýaly, «Madring» ýoly klubuň «Ciudad Real Madrid» türgenleşik toplumynyň ýanynda ýerleşýär. Şertnama awtodromyň önümçilik kuwwatyny giňeltmek üçin ýaryş günlerinde klubuň infrastrukturasynyň bir bölegini peýdalanmagy göz öňünde tutýar.
Mundan başga-da, «Real» Gran-pride birnäçe myhman zolaklaryny ýerleşdirer. Guramaçylar Ispaniýadaky tapgyryň çärelerine klubuň rowaýaty şahsyýetleriniň we «Realyň» beýleki belli wekilleriniň gatnaşmagyny meýilleşdirýär.
2025-nji ýylyň noýabr aýynda Madridiň ýene bir kluby — «Atletiko» Ispaniýanyň Gran-prisiniň hyzmatdaşy bolupdy. «Riýad Eýr Metropolitano» stadiony çäräniň logistika merkezi, muşdaklar üçin güýmenjeleri we VIP zolaklary hödürleýän ýer, şeýle hem ýaryş ýoluna göni awtobus gatnawy bolan nokat hökmünde ulanylar.
