Bloomberg agentliginiň bellemegine görä, Tim Kukuň ýolbaşçylyk eden 15 ýylynyň dowamynda Apple kompaniýasynyň paýnamalary 2258% ösüş görkezdi.
Deňeşdirsek, edil şol döwürde Google-yň paýnamalary 2150% töweregi ösen eken.
Kuk 2011-nji ýylyň awgustynda Stiw Jobsuň ornuna geçip, kompaniýa baş direktor (CEO) bolupdy. Indi bolsa, 1-nji sentýabrdan başlap, bu wezipä Jon Ternus bellenildi. Şol bir wagtyň özünde, Kuk hem Apple-den doly üzülip gitmedi-de, Direktorlar geňeşiniň ýerine ýetiriji başlygynyň wezipesini eýeledi.
Ýeri gelende, Ternus hem turuwbaşdan kompaniýanyň örän ýokary ynamyny gazanmagy başardy. Geljekki maliýe ýylynda onuň binýatlyk zähmet haky 3 million dollara bolar, ýene 55 million dollary bolsa ol paýnama görnüşde alar. Mundan başga-da, oňa adatça iki ýyllyk binýatlyk zähmet hakyna deň bolan pul baýraklarynyň hem berilmegi göz öňünde tutulýar.
Kuk täze wezipä geçenden soň, öňki 3 million dollar zähmet hakynyň ornuna ýylda 2 million dollar binýatlyk zähmet hakyny alyp başlar. Oňa hem 45 million dollar möçberinde Apple-yň paýnamalary bellenildi. 2025-nji ýylda Kuk baş direktor wezipesinde 74,3 million dollar gazanypdy.
Ternusyň enjamlaýyn üpjünçiligi işläp düzmek boýunça uly wise-prezident wezipesinde işlän wagty näçe zähmet hak alandygyny Apple aýan etmeýär. Ýöne, umuman alanyňda, beýle wezipelerde ýylda takmynan 25 million dollar töweregi pul sylagy göz öňünde tutulýar.
Häzirki maliýe ýylynda Ternusa ýene-de 2,5 million dollar möçberinde Apple paýnamalary degişli bolar. Iki ýolbaşçynyň hem kömek pulunyň bir bölegi Apple paýnamalarynyň nyrhlaryna we bazaryň beýleki görkezijilerine bagly bolar.
