Germaniýaly tennisçi Aleksandr Zwerew 2026-njy ýylyň ABŞ-nyň açyk çempionatynda (US Open) ýeňiji boldy. Dünýä reýtinginde ikinji orunda durýan 29 ýaşly türgen finalda ýer eýesi Ben Şeltondan 6:3, 7:6 (7:2), 5:7, 6:2 hasaby bilen üstün çykdy.
Duşuşyk 3 sagat 33 minut dowam etdi.
Bu Zwerewiň «Uly tuwulga» ýaryşlaryndaky ikinji çempionlygy boldy. Ol şu möwsümde mundan ozal Roland Garros – 2026-da hem ýeňiş gazanypdy. Germaniýaly tennisçi jemi alty gezek «Uly tuwulga» ýaryşlarynyň finalyna çykyp gördi.
Zwerew US Open-de ýeňiş gazanan Germaniýanyň ikinji wekili boldy. Ondan öň bu üstünlik diňe Boris Bekkere başardypdy. Ol 1989-njy ýylyň US Open finalynda Çehoslowakiýanyň wekili Iwan Lendlden üstün çykypdy.
2026-njy ýylyň US Open ýaryşynyň umumy baýrak gaznasy rekord 108 million dollara ýetdi. Şeýlelikde, Nýu-Ýorkda geçirilen ýaryş umumy baýrak tölegleri 100 million dollardan geçen ilkinji «Uly tuwulga» ýaryşy boldy. Geçen ýyl bilen deňeşdirilende, baýrak gaznasy 20% artdy.
Şeýlelikde Aleksandr Zwerewe professional tennis taryhynda ýeňiji üçin iň uly möçberdäki pul baýragy — 5,5 million dollar berildi. Zenanlar ýaryşynyň çempiony Ýelena Rybakina hem şonça gazandy.
US Open – 2026-nyň finalynda ýeňlen Ben Şelton bilen Arina Sobolenko bolsa 2,8 million dollar gazandylar.
