Kimi Antonelli ABŞ Gran-prisindäki ýeňşinden soň çempionlyk titulyna ýakynlaşdy

«Mercedes» toparynyň piloty Kimi Antonelli Ostin şäherinde geçirilen ABŞ-nyň Gran-prisinde ýeňiş gazanyp, «Formula-1-iň» dünýä çempiony titulyna ýakynlaşdy. Ýaryşyň bu tapgyry 26-njy oktýabra geçilýän gije boldy.

Italiýaly sürüji ýaryşa pouldan başlap, «Ferrari» toparynyň piloty Şarl Leklerden 13,078 sekunt artykmaçlyk bilen birinji orny eýeledi. Üçlügi «Red Bull» toparynyň sürüjisi Maks Werstappen jemledi.

Bu ýeňiş Antonelli üçin möwsümdäki dokuzynjy ýeňiş boldy. Häzirki wagtda onuň hasabynda 365 utuk bar — bu görkeziji «Mercedes-däki» ýoldaşy Jorj Rassellden 123 utuk we «Ferrari» toparynyň piloty Lýuis Hemiltondan 124 utuk köpdür.

Antonelli çempionlygy eýýäm ABŞ-da resmileşdirip bilerdi, ýöne munuň üçin diňe bir ýaryşda ýeňiji bolmak däl, eýsem bäsdeşleriniň pes görkezijilerine hem bil baglamak gerekdi. Rassell sekizinji, Hemilton bolsa dördünji orny eýeledi, şol sebäpli çempionlyk ugrundaky göreş dowam eder. Şol bir wagtyň özünde, beýleki ýaryşa gatnaşyjylaryň ählisi ýeňiş gazanmak üçin matematiki mümkinçiliklerini ýitirdi.

Indiki tapgyr 1-nji noýabrda Mehiko şäherinde geçiriler. 20 ýaşly Antonellä möwsüm tamamlanmazdan öň çempion bolmak üçin sekizinji orny eýelemek we iki utuk toplamak ýeterlik. Üstünlik gazanylan ýagdaýynda, ol özüniň ilkinji titulyny 23 ýyl 134 gün ýaşynda eýelän Sebastian Fetteliň üstünliginden öňe geçip, «Formula-1» taryhynda iň ýaş dünýä çempiony bolar. Mundan başga-da, Antonelli 1953-nji ýylda çempion bolan Alberto Askariden bäri ilkinji italiýaly çempion bolup biler.

ABŞ Gran-prisinden soňky şahsy sanaw:

1. Andrea Kimi Antonelli (Mercedes) — 365 utuk

2. Jorj Rassell (Mercedes) — 242

3. Lýuis Hemilton (Ferrari) — 241

4. Maks Werstappen (Red Bull) — 236

5. Şarl Lekler (Ferrari) — 233

6. Lando Norris (McLaren) — 211

7. Oskar Piastri (McLaren) — 144

8. Isak Hajar (Red Bull) — 105

9. Liam Louson (Racing Bulls) — 77

10. Pýer Gasli (Alpine) — 42

ABŞ Gran-prisinden soň Konstruktorlaryň kubogy:

1. Mercedes — 607 utuk

2. Ferrari — 474

3. Red Bull — 355

4. McLaren — 355

5. Racing Bulls — 102

6. Alpine — 69

7. Haas — 30

8. Audi — 23

9. Williams — 12

10. Aston Martin — 7

11. Cadillac — 0