4-nji iyulda ABŞ-da Garaşsyzlyk jarnamasynyň kabul edilmeginiň 250 ýyllyk ýubileýi giň gerimde bellenilip geçildi. Ýurduň ähli künjeklerini gurşap alan dabaraly çäreler harby ýörişleri, awiaşoulary, harby gämileriň görkezilişini we uly feýerwerk şüweleňini öz içine aldy. Baýramçylyk aşa yssy howa we birden başlanan güýçli harasat şertlerinde geçdi.
Ýurduň paýtagtynda guralan resmi çäreler rekord derejedäki aşa gyzgyn howa bilen utgaşdy. Waşingtonda howanyň temperaturasy 38 °C-dan geçdi (golaýdaky Baltimorda bolsa 40 °C-a ýetdi) we çyglylygyň ýokary bolmagy ýagdaýy has-da kynlaşdyrdy. «CNN» neşiriniň we gyssagly gulluklaryň berýän maglumatlaryna görä, aşa gyzma sebäpli 51 adam lukmançylyk kömegine ýüz tutdy, olaryň 22-si bolsa hassahana ýerleşdirildi.
Agşama golaý şähere birden güýçli tupan indi. Şol sebäpli tomaşaçylary Milli alleýadan golaýdaky federal binalara wagtlaýyn göçürmeli boldy, olar bu ýerde iki sagat töweregi galdy.
Ýaramaz howa şertleri sebäpli Donald Trampyň çykyşy bir sagatdan gowrak yza süýşürilip, ýerli wagt bilen sagat 23:00-da başlandy. Mundan öň Prezident özüniň Truth Social sosial ulgamynda şeýle ýazypdy: «Howanyň yssylygyna garamazdan (ol çaklanylyşy ýaly erbet bolup çykmady), Waşingtondaky mähelle haýran galdyrýar. Ýurdumyza bolan söýgi hiç wagt häzirki ýaly güýçli bolmandy».
Şeýle hem ol raýatlara «haýsydyr bir ýagynyň» baýramçylygy bozmagyna ýol bermejekdigine ynandyrdy we islendik wagt çykyş etmäge taýýardygyny aýtdy.
Trampyň çykyşy, takmynan, 40 minutlap dowam etdi. Ak tamyň ýolbaşçysy öz beýanatynda şeýle diýdi: «Bu Amerikanyň altyn asyrynyň diňe bir başlangyjydyr. Şu 250-nji 4-nji iýulda biz, iki ýarym asyr mundan ozal bolşy ýaly, ýurdumyzyň, çagalarymyzyň we azatlygyň bähbidi üçin Amerikany täze, ozal görülmedik derejä galdyrjakdygymyzy yglan edýäris. Biz ony has-da uly, has gowy we has güýçli ederis».
Prezident häzirki günde ýurduň «ozalkydan has güýçli, erkin, baý we howpsuz» ýagdaýa gelendigini hem aýratyn nygtady.
Waşingtondaky baýramçylygyň iň ýokary pursaty bir wagtda 10 sany meýdançadan goýberilen, 850 müň atyşlykdan ybarat bolan 40 minutlyk feýerwerk şüweleňi boldy. Bu dabaraly şüweleň asmanda ýyldyrym çakyp duran pursaty guraldy. Guramaçylar bu görkezilişiň taryhdaky iň uly feýerwerk hökmünde Ginnesiň rekordlar kitabyna girmegine garaşýar.
Nýu-Ýorkdaky baýramçylyk maksatnamasyna uly awiaşou, harby we ýelkenli gämileriň ýörişi, şeýle-de däp bolan uly feýerwerk şüweleňi girdi.
Nýu-Ýorkuň kenarynda duran harby gämileriň biriniň bortunda bolsa wise-prezident Jeý Di Wens raýatlaryň öňünde çykyş etdi.
Feýerwerk goýberilen Bruklin köprüsinde bolsa kiçiräk ýangyn ýüze çykdy, ýöne ol derrew öçürildi we ejir çeken bolmady.
Ak tamyň we guramaçylaryň aşa yssy howanyň adamlary gorkuzmagynyň mümkindigi baradaky howatyrlanmalary käbir sebitlerde bölekleýin tassyklandy. Birnäçe şäherlerde yssy howa sebäpli baýramçylyk çäreleri azaldyldy.
Şeýle çäklendirmeler mundan 250 ýyl ozal Garaşsyzlyk jarnamasynyň kabul edilen şäheri bolan Filadelfiýa hem täsir etdi. Şeýle-de bolsa, taryhy «Independens-holl» binasynyň öňünde dabaraly çäre guralyp, geljekki nesillere niýetlenen wagt kapsulasy goýuldy. Ony ýene 250 ýyldan soň — 2276-njy ýylda açmak meýilleşdirilýär.
Kapsulanyň içi her bir ştatdan iberilen simwoliki predmetler bilen dolduryldy. Mysal üçin, Alýaska ştaty göwher, Newada ştaty kazino fışkalaryny iberen bolsa, Kaliforniýa ştaty emeli aň Claude tarapyndan taýýarlanan bu ştatyň iki ýarym asyrdan soň nähili boljakdygy baradaky çaklamany kapsula ýerleşdirdi.
