ABŞ-nyň Telewizion ylymlar we sungat akademiýasy 78-nji «Emmi» telewideniýe baýragyna dalaşgärleri yglan etdi.
Dalaşgärleri göni ýaýlymda aktýorlar Liza Kolon-Zaýas we Jef Hiller tanyşdyrdy. Baýraklary gowşuryş dabarasy 2026-njy ýylyň 14-nji sentýabrynda geçiriler, onuň alypbaryjysy aktrisa Marişka Hargiteý bolar.
Nominasiýalaryň sany boýunça liderler
Seriallaryň arasynda iň köp görkezilen taslamalar şulardan ybarat boldy:
- «Pitt hassahanasy» (Больница Питт, medisina dramasy) — 25 nominasiýa.
- «Hileler» (Хитрости) — 24 nominasiýa.
- «Dul aýallaryň aýlagy» (Бухта вдов, aprel aýynyň ahyrynda çykdy) — 19 nominasiýa.
Striming platformalarynyň arasynda 122 nominasiýa bilen HBO Max öňde barýar. Ikinji orny Netflix (111), üçünji orny bolsa Apple TV (87) eýeledi. Deňeşdirmek üçin, geçen ýyl baýragyň esasy ýeňijileri «Kinostudiýa», «Pitt hassahanasy» we «Ýetginjeklik döwri» taslamalary bolupdy.
Esasy aktýorlyk we serial kategoriýalary
- Iň gowy drama serialy: «Diplomat», «Altyn çaýylan asyr», «Ýedi şalygyň rysary», «Jennet», «Pitt hassahanasy», «Köplerden biri», «Haýal atlar», «Dostlar we goňşular».
- Iň gowy komediýa serialy: «Ebbott başlangyç mekdebi», «Aýy», «Muny hiç kim islänok», «Hileler», «Margonyň pul bilen meselesi bar», «Bir binadaky ölüm», «Terapiýa», «Dul aýallaryň aýlagy».
- Iň gowy mini-serial / antologiýa: «Içimdäki zabun», «Garpyşyk», «Hemme zada ol günäkär», «GKS Sent-Luis», «Söýgi hekaýasy».
- Iň gowy aktrisa (drama): Kerri Kun, Çeýz Infiniti, Keri Rassel, Reý Sihorn, Zendeýa.
- Iň gowy aktýor (drama): Sterling K. Braun, Geri Oldman, Mark Ruffalo, Rufus Sýuell, Noa Waýli.
- Iň gowy aktrisa (komediýa): Kinta Branson, Aýo Edebiri, El Fanning, Liza Kudrou, Jin Smart.
- Iň gowy aktýor (komediýa): Ýahýa Abdul-Matin II, Mettýu Riz, Stiw Karell, Jeýson Sigel, Martin Şort.
Ýüz ýaşly Dewid Attenboronyň rekordy
Maý aýynda özüniň 100 ýaşyny belleýän meşhur britaniýaly tebigatçy we kinorežissýor Dewid Attenboro «Emminiň» taryhynda iň uly ýaşly dalaşgär hökmünde resmi taýdan ykrar edildi.
Şu ýyl ol «Tanymal kyssaçy» kategoriýasynda Netflix tarapyndan taýýarlanan «Dewid Attenboro. Gorillalar barada hekaýat» we National Geographic-iň «Dewid Attenboro: Umman» atly dokumental filmleri üçin birbada iki sany baýraga dalaş edýär.
Ozal Attenboro bu nominasiýada eýýäm üç gezek (iň soňky gezek 2020-nji ýylda) ýeňiji bolupdy, geçen ýyl bolsa Bi-bi-si üçin düşürilen «Aziýa» dokumental taslamasy bilen dalaşgär görkezilipdi. Ýüz ýaşly telealypbaryjy 2022-nji ýylda 99 ýyl 11 aý ýaşynda dalaşgär bolan prodýuser Norman Liriň rekordyny täzeledi.
