Aýdymçy Teýlor Swift we amerikan futbolynyň oýunçysy Trewis Kelsiniň 3-nji iýulda bolan toý dabarasy uly göwrümli toýlaryň bahasyna bolan gyzyklanmany ýene-de artdyrdy. Toý Nýu-Ýorkuň «Madison Square Garden» arenasynda geçirildi. Bu ýer ýörite dabara üçin köp sanly bezegler we janly agaçlar bilen gülleýän baglyga öwrüldi.
Bu çäre, takmynan, müňe golaý myhmany, şol sanda Bredli Kuperi, Jiji Hadidi we Ed Şirany bir ýere ýygnady, dabaranyň özüni bolsa Adam Sendler alyp bardy. Swift toýuň dowamynda «Dior» brendinden birnäçe gezek lybasyny çalyşdy.
Toýuň sebäpkärleri çykdajylary mälim etmedi, ýöne «Forbes» neşiriniň hasaplamalaryna görä, şäher häkimiýetleriniň harajatlaryny hem hasaba alanyňda, toý 20–30 million dollara düşen bolup biler. Ýöne şeýle uly möçberdäki pul hem käbir milliarderleriň toýlarynyň ýanynda gaty ujypsyz görünýär.
Soňky ýyllaryň esasy toý býujetleri
Anant Ambani we Radhika Merçant (~600 million dollar)
Bu jübütleriň birnäçe aýlap dowam eden dabaralaryny «Reuters» we beýleki habar beriş serişdeleri, takmynan, 600 million dollar diýip bahalandyrdy, bu bolsa ony häzirkizaman taryhynda iň gymmat toýlaryň birine öwürýär. Pullaryň esli bölegi ýüzlerçe VIP myhmanlar üçin hususy uçarlara, uly göwrümli bezeglere we artistleriň töleglerine harçlandy. Diňe Jastin Biberiň bir gezekki çykyşy üçin, KHBS-iň maglumatyna görä, 10 million dollar töweregi tölenildi. Şeýle-de, toýda Rianna we Keti Perri dagy hem çykyş etdi. Myhmanlaryň sanawynda Kim Kardaşýan, Boris Jonson we Toni Bler hem bardy.
Jeff Bezos we Loren Sançes (46–56 million dollar):
Esasy çykdajylar Wenesiýa şäherine sarp edildi. Myhmanlaryň 95 töweregi hususy jetleri kabul edildi, iň gowy myhmanhanalar (meselem, «Aman Venice») kärendesine alyndy, 30-dan gowrak hususy suw taksileri tutuldy, tagamlara bolsa 3 Mişlen ýyldyzly şef-aşpez jogap berdi. Üç günlük dabaralara 200-den 250-ä çenli adam çagyryldy, olaryň arasynda Bill Geýts, Opra Winfri, Orlando Blum we Iordaniýanyň şa zenany Raniýa bardy.
Şazada Garri we Megan Markl (~43–45 million dollar):
Guramaçylygyň özi (takmynan, 265 000 dollarlyk «Givenchy» köýnegi, 150 000 dollarlyk güller, keýtering) 2,7 million dollar töweregi boldy. Galan 40+ million dollar bolsa — patyşa maşgalasynyň we myhmanlaryň howpsuzlygy üçin snaýperlere, gizlin polisiýa gullugyna we dronlara garşy ulgamlaryna sarp edilen harajatlardyr.
Windzordaky Keramatly Georgiý kapellasynda geçirilen dabara 600 sany myhman, şol sanda Elton Jon, Serena Wilýams, şeýle-de Bekhemler we Kluni maşgalalary gatnaşdy.
Işa Ambani we Anand Piramal (15–100 million dollar):
Udaýpurda bolan toý öňündäki çärelere bütin Bolliwud we dünýä syýasatçylary ýygnandy. Resmi wekiller habar beriş serişdelerine hakyky görkezijiniň 15 million dollara ýakyndygyny ynandyrjak boldy, ýöne «Forbesiň» bilermenleri Beýonseniň gonoraryny we hususy gatnawlary hasaba alyp, 100 million dollaryň sarp edilendigini hasaplady.
Jo Nahmad we Medison Hedrik (~13 million dollar):
Milliarder galereýaçynyň toýy Sardiniýanyň abraýly Kosta-Smeralda dynç alyş zolagynda, ýapyk şertlerde geçdi. Ambani maşgalasynyň ýanynda has «sadaja» görünýän bu býujet dolulygyna bäş ýyldyzly hyzmatlara, kaşaň kurorta hem-de top-modeller we Golliwud ýyldyzlary üçin guralan güýmenjelere sarp edildi.
Baha nämelerden emele gelýär
KHBS-de toýlaryň bahasynyň dürlüçe görkezilmeginiň sebäbi dürli faktorlaryň hasaba alynmagydyr. Käbir neşirler diňe banketi we dabaranyň özüni hasaplaýan bolsalar, beýlekileri — bütin toý uik-endiniň çykdajylaryny, ýagny uçuşlary, ýerleriň kärendesini, howpsuzlygy, myhmanlaryň ýaşaýşyny we olaryň lybaslaryny hem bilelikde hasaplaýar.
Meselem, «Business Insider» neşiriniň bellemegine görä, şazada Garri we Megan Marklyň toý býujetiniň, takmynan, 94%-ini gorag we howpsuzlyk çäreleri düzdi, munuň içine hatda zir-zibilleriň arassalanmagy, ýollardaky oýuklaryň abatlanmagy we şäherdäki heýkelleriň kepderilerden goralmagy hem girdi.
