Abraýly halkara žurnalist we ykdysadyýet boýunça seljeriji Jon Defterios 31-nji «Türkmenistanyň nebiti we gazy – 2026» (OGT 2026) halkara maslahatynyň we sergisiniň Baş alypbaryjysy we Baş halkara moderatory bolar. Bu forum 21-23-nji oktýabr aralygynda Aşgabatda «Energetika. Hyzmatdaşlyk. Ösüş» şygary astynda geçiriler.
Defterios döwlet edaralarynyň, milli nebit-gaz kompaniýalarynyň, halkara energetika korporasiýalarynyň, maliýe institutlarynyň, maýadarlaryň we pudak hünärmenleriniň gatnaşmagynda plenar mejlisleri hem-de ýokary derejeli halkara sessiýalary alyp barar.
Guramaçylaryň maglumatlaryna görä, dünýäniň dürli ýurtlaryndan 150-den gowrak wekil eýýäm forumyň işine gatnaşjakdygyny tassyklady. Sergi meýdançalarynyň ählisi doly satyldy, Azerbaýjanyň SOCAR döwlet nebit kompaniýasy bolsa çäräniň premýer-hyzmatdaşlarynyň hataryna goşuldy.
Jon Defterios 35 ýyldan gowrak tejribesi bolan halkara žurnalist, ykdysady seljeriji, moderator we alym bolup, ol dünýä ykdysadyýetiniň, energetikasynyň we halkara söwdasynyň meselelerini beýan edýär.
Ol ozal CNN Business teleýaýlymynda ösüp barýan bazarlar boýunça redaktor we alypbaryjy bolup işledi, Reuters Television hem-de PBS Television bilen hyzmatdaşlyk etdi, şeýle-de iň uly halkara ykdysady we energetika forumlarynyň mejlislerine başlyklyk edip, moderator hökmünde çykyş etdi. Häzirki wagtda ol Nýu-Ýork uniwersitetiniň Abu Dabidäki bölüminiň biznes professory we APCO Worldwide kompaniýasynyň strategik uly geňeşçisidir.
OGT 2026 forumynyň dowamynda gatnaşyjylar nebit-gaz pudagyna döwrebap tehnologiýalary ornaşdyrmak, sanlylaşdyrmak, emeli aňy ulanmak, energiýa netijeliligi, metan zyňyndylaryny azaltmak we maýa goýumlary çekmek ýaly meseleleri maslahatlaşar.
Bu forumyň guramaçylary hökmünde «Türkmengaz» we «Türkmennebit» döwlet konsernleri, «Türkmengeologiýa» döwlet korporasiýasy hem-de «Turkmen Energy Forum» hojalyk jemgyýeti çykyş edýär.
