27-nji iýulda Türkmenistanyň Daşary işler ministrliginde Ykdysady hyzmatdaşlyk boýunça türkmen-eýran hökümetara toparynyň bilelikdäki başlyklarynyň — Türkmenistanyň daşary işler ministri Raşid Meredowyň hem-de Eýranyň Ýol we şähergurluşyk ministri Farzane Sadeg Malwajerdiň duşuşygy geçirildi. Bu barada türkmen daşary syýasat edarasy habar berýär.
Taraplar ikitaraplaýyn hyzmatdaşlygyň häzirki ýagdaýyny we geljegini, şeýle hem halkara guramalaryň, ilki bilen BMG-niň çägindäki hyzmatdaşlygy gözden geçirdi. Duşuşykda iki döwletiň arasyndaky gatnaşyklaryň binýadynda duran hoşniýetli goňşuçylyk we özara hormat goýmak ýörelgeleriniň ähmiýeti bellenilip geçildi.
Eýran tarapy Türkmenistany BMG-niň Baş Assambleýasy tarapyndan ýurduň başlangyjy bilen «Halkara hukugynyň ýyly, 2028-nji ýyl» atly Kararnamanyň kabul edilmegi bilen gutlady, Eýran bu resminamanyň awtordaşy hökmünde çykyş edipdi.
Duşuşyga gatnaşyjylar söwda-ykdysady hyzmatdaşlygyň meselelerini hem maslahatlaşdy we Ykdysady hyzmatdaşlyk boýunça türkmen-eýran hökümetara toparynyň eýeleýän ornuny mundan beýläk-de berkitmek barada pikir alyşdy.
Gepleşikleriň netijeleri boýunça taraplar özara bähbitli bolan ähli ugurlar boýunça hyzmatdaşlygy yzygiderli ösdürmäge bolan gyzyklanmalaryny tassyklady.
