Özbegistan bilen Hindistan 30 güne çenli hereket etjek wizasyz düzgün barada ylalaşdylar. Bu hakda Özbegistanyň Syýahatçylyk guramasynyň metbugat gullugy habar berýär.
Degişli ylalaşyklar Özbegistanyň Prezidenti Şawkat Mirziýoýew bilen Hindistanyň Premýer-ministri Narendra Modiniň arasynda geçirilen gepleşikleriň jemleri boýunça gazanyldy. Taraplar 2026–2028-nji ýyllar üçin syýahatçylyk ulgamynda hyzmatdaşlyk maksatnamasyna gol çekdiler.
Indi Özbegistanyň raýatlary Hindistana baranynda ol ýerde 30 güne çenli wizasyz bolup biler. Özbegistana geljek Hindistanyň raýatlary üçin hem edil şeýle düzgüni ýola goýmak göz öňünde tutulýar.
Maksatnamada bilelikdäki medeni çäreleri we kinofestiwallary geçirmek hem meýilleşdirilýär. Mundan başga-da, ýurtlar özara syýahatçylyk akymyny köpeltmek üçin bu babatda täze ugurlary döretmegi-de maksat edinýär.
