31-nji awgustda Bişkekde (Gyrgyzystan) VI Bütindünýä çarwadarlar oýunlarynyň açylyş dabarasy boldy. Ýaryşlara dünýäniň 100-den gowrak ýurdundan türgenler, şol sanda Türkmenistanyň wekilleri gatnaşýar. Dabara «Bişkek Arena» stadionynda geçirildi.
Halkara sport-medeni çäresiniň maksatnamasy medeni, etnosport we ylmy ugurlary öz içine alýar. Ýaryşlar sportuň 43 görnüşi, şol sanda milli göreş, at çapyşyklary, ýaýdan atmak, intellektual oýunlar we beýleki milli ugurlar boýunça geçirilýär.
Türkmenistanyň türgenleri türkmen milli göreşi we sportuň beýleki görnüşleri boýunça geçiriljek ýaryşlara gatnaşar.
Ýaryş 6-njy sentýabra çenli dowam eder. Esasy çäreler Çolpon-Ata şäherinde geçirilýär. Kyrçyn jülgesinde Oýunlaryň çäginde 300-den gowrak gara öýden ybarat bolan etnoşäherçe döredildi. Bu ýerde gyrgyz halkynyň milli medeniýeti, amaly-haşam sungaty we çarwa durmuş ýörelgesiniň däp-dessurlary görkezilýär.
Bütindünýä çarwadarlar oýunlary Merkezi Aziýanyň milli däp-dessurlaryny, medeni mirasyny we etnosport görnüşlerini wagyz etmäge gönükdirilen halkara çäredir.
