Günorta Koreýanyň hökümeti 2027-nji ýyl üçin rekord derejedäki — 821 trillion won (takmynan, 595 milliard dollar) çykdajylary öz içine alýan býujet taslamasyny hödürledi. «Yonhap» agentliginiň habar bermegine görä, bu häzirki maliýe meýilnamasynda göz öňünde tutulan çykdajylardan 12,8% köpdür.
Hökümet çykdajylaryň şol derejede artmagyny dogluş görkezijileriniň peselmegi, sebitlerde ilat sanynyň azalmagy we emeli aňy ösdürmek ýaly uzak möhletleýin meseleleri çözmek zerurlygy bilen düşündirýär.
Agentlik bu babatda ýörite ministr Pak Hon Gynyň sözlerini salgylanýar:
«Ýarymgeçirijiler önümçiliginiň güýçli ösmegi netijesinde alnan uly möçberdäki salgyt girdejileri ýurdumyzyň ykdysady we sosial ulgamlarynda täzeçilligi höweslendirmäge strategik taýdan gönükdiriler».
Şunlukda, çip önümçiliginden alnan goşmaça girdejileriň hasabyna «Geljegiň gaznasyny» döretmek meýilleşdirilýär. 2027-nji ýylda onuň möçberi 162,3 trillion won bolar. Bu serişdeler önümçiligi ösdürmäge, bilime we ýaşlary goldamaga gönükdiriler.
Emeli aň ulgamyndaky taslamalara çykdajylar, takmynan, iki esse artyp, 21,3 trillion wona ýeter. Serişdeler, hususan-da, senagat toplumlaryny ösdürmek üçin zerur bolan infrastruktura, şol sanda elektrik we suw üpjünçiligine sarp ediler.
Şonuň ýaly-da hökümet ýarymgeçirijilerden başga-da ykdysady ösüşiň täze çeşmelerini tapmagy maksat edinýär. Ýadro sintezi, kiçi modul reaktorlary, kwant tehnologiýalary, kosmos senagaty we öňdebaryjy biotehnologiýalar üçin 62,8 trillion won, ýagny 2026-njy ýyl bilen deňeşdirilende, 22,7% köp serişde bölüp bermek meýilleşdirilýär.
2027-nji ýylda býujet girdejileriniň 30,4% artyp, 880,8 trillion wona ýetmegine garaşylýar. Döwlet karzy bolsa 106 trillion won köpelip, 1 519,8 trillion wona ýeter, bu häzirki 51,6%-iň deregine JIÖ-niň 48,3%-ine deň bolar.
