Argentinada ýurduň çempionatynyň ähli diwizionlarynyň golaýdaky tapgyrda boljak duşuşyklary Lionel Messiniň şanyna az salymlyk togtadylar. Argentinanyň Futbol Assosiasiýasy (AFA) futbolçynyň milli ýygyndydaky karýerasynyň hormatyna bir minutlyk el çarpyşmalar üçin oýnuň 10-njy minutda saklanjakdygyny mälim etdi.
«Indiki oýunda erkekler we zenanlar ugurlarynyň ähli kategoriýalarynda (futbol, futzal we kenar futboly) birinji ýarymyň on minuty geçenden soň oýun saklanar we Lionel Messiniň Argentinanyň ýygyndysynyň düzümindäki karýerasyny ykrar etmegiň nyşany hökmünde bir minutlyk el çarpyşmalar guralar» diýlip AFA-nyň beýanatynda aýdylýar.
Onunjy minutyň saýlanmagy Messiniň köp ýyllaryň dowamynda Argentinanyň ýygyndysynda göteren oýun belgisi bilen baglanyşyklydyr.
31-nji awgustda Messi Argentinanyň milli ýygyndysyndaky karýerasyny tamamlaýandygyny yglan etdi. Ol milli toparda 2005-nji ýyldan bäri oýnap, 207 oýna gatnaşdy we 125 gol geçirdi. Futbolçy topar bilen 2022-nji ýylyň Dünýä çempionatynda ýeňiji boldy. Şeýle hem onuň hasabynda 2008-nji ýylyň Olimpiadasynyň altyn medaly, iki sany Amerika Kubogy (2021, 2024) we 2022-nji ýylyň Finalissima ýaryşynyň kubogy bar.
39 ýaşly hüjümçi üçin ýygyndydaky soňky oýun 2026-njy ýylyň dünýä çempionatynyň Ispaniýa garşy geçirilen finaly boldy. 19-njy iýulda geçen aýgytly duşuşyk goşmaça wagtda argentinalylaryň 0:1 hasabyndaky ýeňlişi bilen tamamlandy.
