Kronenbergiň Pilbergen atçylyk sport toplumynyň «Milestone Farm» meýdançasynda ahalteke atlarynyň dünýä çempionatynyň we gözellik bäsleşiginiň netijeleri yglan edilip, ýeňijilere baýraklaryň gowşurylyş dabarasy geçirildi.
«Watan» habarlar gepleşiginde aýdylyşy ýaly, bäsleşigiň dowamynda dünýäniň dürli ýurtlaryndan gelen eminler topary ýaryşa gatnaşan ahalteke bedewlerine beden gurluşyna, gözelligine we meýdançada özüni alyp barşyna görä baha berdi.
Şeýlelikde, «Ahalteke atlarynyň arasynda Dünýä çempiony 2026» bäsleşiginiň netijesi boýunça, atly sport we gözellik bäsleşiginiň dünýä çempionatynyň ýeňijisi, Absolýut çempion diýen ada we «Dünýä çempiony» baýragyna fransiýaly atşynas, «CaratKoum» atçylyk toplumynyň eýesi Odri Martinesiň Ýandym diýen gara reňkli aty mynasyp boldy. Ýeňijä Türkmenistanyň Prezidentiniň adyndan täze – BMW 7 Series (G70) awtoulagynyň açary gowşuryldy.
Bäsleşikleriň netijeleri we baýraklar:
- «Ýaş atlaryň çempiony»: Halkara ahalteke atçylyk sport toplumynyň Meledag diýen bedewi – 10 müň ýewro we kubok;
- «Ýewropanyň iň gowy bedewi»: fransiýaly hususy atşynas A.Beýliniň Agana Şael diýen aty – 10 müň ýewro we kubok;
- «Iň owadan bezelen at»: Türkmenistanyň Prezidentiniň Ahalteke atçylyk toplumyna degişli Toýly atly mele bedew – 5 müň ýewro we kubok;
- 1 we 2 ýaşar atlaryň gözellik bäsleşigi: Halkara ahalteke atçylyk sport toplumynyň Jerengözli diýen bedewi – 3 müň ýewro we kubok;
- 3 ýaşar atlaryň bäsleşigi: Halkara ahalteke atçylyk sport toplumynyň Güneş diýen aty – 3 müň ýewro we kubok;
- 3 we 4 ýaşar atlaryň bäsleşigi: fransiýaly S.Plaýiniň Ming-de-Ahal atly aty – 3 müň ýewro we kubok;
- 5 we uly ýaşar atlaryň bäsleşigi: Ukrainadan B.Mamelekowyň Ýagşyja–Owadan atly mele bedewi – 3 müň ýewro we kubok;
- Dressaž (atyň owadan hereketi): ukrainaly atşynas Liliýanyň Bady-Saba diýen aty – 3 müň ýewro we kubok.
- Konkur bäsleşigi: Türkmenistanyň Milli atly sport merkeziniň türgeni Yhlas Çopanow – 3 müň ýewro we kubok.
Çäräniň çäklerinde Türkmenistan bilen Niderlandlaryň arasyndaky dostlugyň nyşany hökmünde Gurbanguly Berdimuhamedowa friz tohumly at sowgat berildi. Friz tohumy dünýäde iň meşhur at tohumlarynyň biri bolup, onuň ady Niderlandlaryň Frislandiýa welaýaty bilen baglanyşyklydyr.
