Türkmenistanyň Prezidenti Serdar Berdimuhamedow 9-njy sentýabrda Ýewropa Bileleşiginiň we Fransiýa Respublikasynyň täze bellenilen ilçileri bilen duşuşyklary geçirdi. Bu barada «Watan» habarlar gepleşiginde aýdyldy.
Ýewropa Bileleşiginiň ilçisi Lýuk Pýer Dewin we Fransiýanyň ilçisi Alena Grand döwlet Baştutanyna ynanç hatlaryny gowşurdy.
Lýuk Pýer Dewin bilen geçirilen duşuşykda Prezident Ýewropa Bileleşiginiň ýurduň möhüm halkara hyzmatdaşlarynyň biri bolup galýandygyny belledi. Ikitaraplaýyn gatnaşyklar özara hormat goýmak, ynanyşmak we umumy bähbitler esasynda ýola goýulýar.
Söwda-ykdysady hyzmatdaşlyga aýratyn üns berildi. Söwda dolanyşygyny artdyrmak, Ýewropa kompaniýalary bilen işewür gatnaşyklary giňeltmek we täze maýa goýum taslamalaryny durmuşa geçirmek mümkinçilikleri barada gürrüň edildi. Beýleki geljegi uly ugurlaryň hatarynda energetika, ulag we logistika, senagat, oba hojalygy, sanly tehnologiýalar we daşky gurşawy goramak ugurlary agzalyp geçildi.
Şeýle hem taraplar Hazar deňziniň üsti bilen Ýewropa bazarlaryna çykýan ugurlary we Hazarüsti ulag geçelgesiniň mümkinçiliklerini ösdürmegiň umumy bähbitlere laýyk gelýändigini bellediler. Şunuň bilen birlikde, energetika ulgamynda, şol sanda gaýtadan dikeldilýän energiýa çeşmelerini ösdürmek, «ýaşyl» ykdysadyýete geçmek boýunça hyzmatdaşlygy giňeltmek üçin uly mümkinçilikleriň bardygy aýdyldy.
Alena Grand bilen geçirilen duşuşykda Prezident Fransiýanyň Türkmenistanyň Ýewropadaky esasy hyzmatdaşlarynyň biridigini belledi.
Taraplar söwda-ykdysady, energetika, medeni-ynsanperwer hyzmatdaşlygy, şeýle hem halkara guramalarynyň çäklerindäki özara gatnaşyklary maslahatlaşdy.
Şol gün diplomatlar bilen Türkmenistanyň daşary işler ministri Raşid Meredow hem duşuşdy. Daşary syýasat edarasynyň ýolbaşçysy ilçileri täze wezipelere bellenmegi bilen gutlady.
