Geçen gije UEFA Çempionlar ligasynyň umumy tapgyrynda birinji turuň soňky alty duşuşygy geçirildi. Oýunlarda jemi 23 gol geçirildi. Iň geň galdyryjy netijäni ýaryşa ilkinji gezek gatnaşýan «Komo» görkezdi. Sesk Fabregasyň tälim berýän topary «RB Leýpsigi» garaşylmadyk ýagdaýda 4:1 hasabynda ýeňdi.
Ýöne geliň, her bir oýunda yzygiderli saklanalyň...
«Fenerbahçe» (Türkiýe) — «Roma» (Italiýa) — 1:1
Stambulda ilki myhmanlar hasaby açdy. 39-njy minutda Doniell Maleniň pasyndan soň Braýan Kristante ÇL-däki ilkinji goluny geçirdi.
«Fenerbahçe» ikinji ýarymyň başynda hasaby deňledi. 48-nji minutda Meýson Grinwuddan gelen topy Arçi Braun derwezä gönükdirdi. Duşuşygyň soňky minutlarynda ýer eýeleri ýeňiş gazanmaga golaýlapdylar, ýöne Natan Akeniň süsen topy derwezäniň ýokarky sütünine degdi.
Oýundan soň «Fenerbahçäniň» tälimçisi Ismaýyl Kartal göni press-konferensiýada wezipesinden çekilýändigini mälim etdi. Ol wezipä bary-ýogy iýun aýynda bellenipdi.
«Men öz wezipämden çekilýän. Özem hiç haçan gaýdyp gelmezlik şerti bilen. Klubuň ýoluny açmak üçin şeýle karara geldim» diýen 65 ýaşly tälimçiniň sözlerini TRT Spor getirýär.
KHBS-iň habar bermegine görä, oýundan soň janköýerleriň biri tälimçä tarap suwly guty zyňypdyr. Onuň gelen kararyna şol pursat sebäp bolan bolmagy-da ähtimal.
Her niçiksi bolsa-da, klubuň prezidenti Aziz Ýyldyrym onuň işden gitmek baradaky arzasyna gol çekmekden ýüz öwürdi.
Ýene bir gyzykly maglumat, türk klubunyň garşysyna «Romanyň» futbolçylary «Nepal bilen bilelikde» diýen ýazgyly köýnekçeler bilen meýdança çykypdylar. Bu ädim şol ýurtda suw joşmasyndan ejir çekenlere goldaw hökmünde edildi.
Şol bir wagtyň özünde, «Roma» barybir öz hemişeki hemaýatkäri baradaky ýazgy ýerleşdirilen köýnekçeler bilen meýdança çykyp bilmezdi, sebäbi Türkiýede bukmekerlik edaralarynyň mahabatlaryna gadaganlyk girizilipdi.
PSW (Niderlandlar) — «Şahtýor» (Ukraina) — 1:1
«Şahtýor» birinji ýarymyň ahyrynda hasaby açdy. Gleýker Mendoza gapdaldan merkeze süýşüp, aşaklyk bilen topy derwezä girizdi. PSW arakesmeden soň tizara jogap berdi: 48-nji minutda hasaby Serjinýo Dest deňledi. Netijede, iki topar hem bir utuk gazandy.
«Bawariýa» (Germaniýa) — «Budö-Glimt» (Norwegiýa) — 5:0
Birinji ýarymda öz toparyny birnäçe gezek halas edip, gol geçirmedik derwezeban Nikita Haýkin ikinji taýmda şikes sebäpli oýny dowam etdirip bilmedi, «Budö-Glimt» ony çalyşmaly boldy. Şondan soňam gollar ýagyp başlady.
47-nji minutda Jamal Musiala hasaby açdy, 61-nji minutda Harri Keýn ikinji goly geçirdi. Iňlis hüjümçisi ÇL-de yzly-yzyna sekizinji duşuşykda gol geçirýär.
Soňra Alfonso Deýwis hem tapawutlandy. Maýkl Olise bolsa 83-nji minutda we goşmaça wagtda gol geçirip, dubl etdi.
Oýun gutaranyndan soň Maýkl Olise bilen žurnalistiň arasynda şeýle söhbetdeşlik boldy:
— Şeýle ajaýyp gollary salanyňda nähili duýgulary başdan geçirýäň?
— Bilemok.
— Umuman, şeýle gollary nädip geçirip bilýäň?
— Depýän welin, top derwezä girýär.
«Komo» (Italiýa) — «RB Leýpsig» (Germaniýa) — 4:1
«Komo» ÇL-däki ilkinji duşuşygynda özüne bildirilýän tamany artygy bilen ödedi. Martin Baturina eýýäm 15-nji minutda hasaby açdy, 38-nji minutda bolsa Tasos Duwikas ýer eýeleriniň artykmaçlygyny iki gola çykardy. Arakesmeden soň Assan Diao üçünji goly geçirdi.
«Leýpsig» Andrij Maksimowiçiň goly bilen jogap berdi, ýöne duşuşygyň soňunda Maksimo Perrone italiýalylaryň dördünji goluny geçirip, oýnuň soňky nokadyny goýdy — 4:1. Sesk Fabregasyň şägirtleri klubuň taryhyny ýazmagy dowam etdirýärler.
«Mançester Ýunaýted» (Angliýa) — «Sabah» (Azerbaýjan) — 4:0
«Sabah» üçin bu ÇL-iň esasy tapgyryndaky ilkinji duşuşyk boldy. Emma «Old Traffordda» olary kän bir mähirli garşylamadylar. Ýer eýeleri oýny doly öz erklerinde saklap, dört gol geçirdiler.
Oýunda Matteus Kunýa (27-nji minutda), Brunu Fernandeş (43), Benýamin Şeşko (45) hem-de Lisandro Martines (68) tapawutlanmagy başardylar.
«Slawiýa» (Çehiýa) — «Lens» (Fransiýa) — 2:3
Pragaly topar ikinji ýarymyň başynda Daniel Şturmyň goly bilen hasaby açdy. «Slawiýanyň» goragçysy Martin Koneçniniň gyzyl kart alyp, meýdançadan çykarylmagyndan soň «Lens» artykmaçlyk gazandy we 73-nji minutda Abdallah Simanyň goly bilen hasaby deňledi.
Şturm 88-nji minutda ikinji goluny hem saldy. Emma duşuşygyň goşmaça wagtynda fransuz topary iki minutda iki gol urup, hakyky kambek etmegi başardy. Florian Towen 90+1-nji minutda hasaby deňledi, Ruben Agilar bolsa 90+3-de ýeňiş goluny geçirdi. Hasap myhmanlaryň peýdasyna 3:2 boldy.
