Alber Uderzon tarapyndan çekilen «Asteriks Britaniýada» komiksi üçin taýýarlan sahabynyň asyl nusgasy Lýežde geçirilen auksionda 1,2 million ýewro satyldy. Ýygymlary göz öňünde tutanyňda, alyjy 1,47 million ýewro töledi — bu suratkeşiň işleri üçin rekord görkeziji diýip, Belga agentligi habar berýär.
Auksiondan öň bu işe bary-ýogy 150–200 müň ýewro möçberinde baha kesilipdi.
Uderzo ölçegi 34x47 santimetr bolan gaty kagyzyň ýüzünde guaş bilen gallar baradaky sekizinji hekaýany suratlandyrypdy. Bu suratda awtorlaryň öz eli bilen galdyran ýadygärlik ýazgysy hem saklanyp galypdyr.
Auksionyň guramaçylary bu işiň «Disney-den miras galan stili, karikatura mahsus ýüz keşpleri hem-de sungat taryhyna giren nepis inçelikleri özünde jemleýändigini» belleýär.
«Asteriks» — fransuz ssenariçisi Rene Gosinni hem-de suratkeş Alber Uderzonyň bilelikde döreden komiksler toplumy. Rimlilere garşy durýan gall obasy baradaky ilkinji hekaýa 1959-njy ýylyň 29-njy oktýabrynda «Pilote» žurnalynda peýda boldy.
Seriýanyň baş gahrymanlary hökmünde ugurtapyjy gal Asteriks we onuň güýçli dosty Obeliks çykyş edýär. Komiksler 100-den gowrak dile terjime edildi, olaryň umumy tiražy bolsa 380 million nusgadan geçdi.
«Asteriks Britaniýada» ilkinji gezek 1966-njy ýylda çykdy. Sýužet boýunça gahrymanlar rimlilere garşy söweşýän britan obasyna kömek etmek üçin La-Manş arkaly ýola düşýär.
