Toyota kompaniýasy 2028-nji ýylda Hytaýda Corolla awtoulagynyň täze nesliniň önümçiligine başlamagy meýilleşdirýär. AutoHome neşiriniň habar bermegine görä, täze ulag öňki ýaly «Corolla» adyny saklar, ýöne onuň daşky sypaty 2025-nji ýylda görkezilen adybir konsept awtoulaga ýakyn bolar. Şeýle hem ulagyň hereketlendirijisi-de birnäçe görnüşde hödürlener.
Täze Corolla Toyota kompaniýasynyň eýýäm ulanylýan platformasynyň esasynda öndüriler. Bu platforma, hususan-da, häzirki Lexus ES kysymly awtoulagda hem ulanylýar. Şeýle çözgüt täze modeli işläp taýýarlamak üçin edilýän çykdajylary azaltmaga mümkinçilik berer.
Hytaý bazarynda doly elektrik energiýasy bilen işleýän Corolla hem-de elektrik toguna birikdirip zarýad berip bolýan gibrid görnüşlerine aýratyn üns berler. Deslapky maglumatlarda aýdylyşy ýaly, beýleki ýurtlaryň bazarlary üçin hem zarýad bermek zerurlygy bolmadyk gibrid görnüşi we adaty içinden ýandyrylýan hereketlendirijili nusgalary taýýarlanar.
Täze awtoulag FAW Toyota bilelikdäki kärhanasynyň önümçilik kuwwatyndan peýdalanyp öndüriler. Emma täze modeliň önümçilige goýberiljek wagtyna çenli kärhananyň düzümi üýtgäp biler. Sentýabryň ahyrynda GAC konserni Toyota bilen bilelikdäki kärhanadaky FAW kompaniýasyna degişli paýy satyn almak isleýändigini mälim etdi. Bu geleşigi iki konserniň arasynda baglaşylan strategik hyzmatdaşlyk boýunça ylalaşygyň çäklerinde amala aşyrmak meýilleşdirilýär.
