Şu gün Aşgabatda ýurduň möhüm üpjünçilik we önümçilik ulgamlaryny öz içine alýan «Türkmenistanyň gurluşyk, senagat, himiýa, energetika pudaklarynyň ösüşi» (CIET 2026) atly halkara sergi we maslahat açyldy. Bu waka mynasybetli Türkmenistanyň Prezidenti Serdar Berdimuhamedow giň gerimli çärä gatnaşyjylara gutlag hatyny iberdi. Hatyň doly teksti TDH tarapyndan neşir edildi.
Döwlet Baştutany öz gutlagynda bu çäräniň ähmiýetini nygtady:
«Bu halkara sergi we maslahat ýurdumyzyň senagat kuwwatyny artdyrmakda, gurluşyk we senagat toplumynyň pudaklaryny ösdürmekde, milli ykdysadyýetimizi diwersifikasiýalaşdyrmakda, dünýä bazarlarynda uly islegden peýdalanýan önümleriň täze önümçiliklerini döretmekde hem-de hereket edýän kärhanalaryň kuwwatlyklaryny artdyrmakda möhüm ähmiýete eýedir».
Gutlag hatynda ýurtda amala aşyrylýan giň gerimli gurluşyk işlerine, hususan-da, Aşgabat şäherinde we welaýatlarda ulanmaga berlen täze binalar toplumlaryna, şol sanda Arkadag şäheriniň ikinji tapgyrynyň gurluşygyna hem-de Mary welaýatynyň Ýolöten etrabynyň çäginde 4 müň 500 öýli täze döwrebap şäherçäniň düýbüniň tutulmagyna aýratyn üns çekildi. Gutlagda bellenilişi ýaly, ýurtda türkmen halkynyň Milli Lideriniň «Döwlet adam üçindir!» diýen ýörelgesi rowaç alýar.
Döwlet Baştutany senagat pudagyny düýpli kämilleşdirmegi, ýerli çig mallardan ekologik taýdan arassa we bäsdeşlige ukyply önümleri öndürmegi döwlet syýasatynyň ileri tutulýan ugurlarynyň biri hökmünde görkezdi. Lebap we Bäherden sement zawodlarynyň ikinji tapgyrlarynyň işe girizilmegi we paýtagtyň demirgazygyndaky senagat toplumynyň çäginde döwrebap çüýşe önümlerini öndürýän önümhananyň ulanmaga berilmegi bu ugurda gazanylýan üstünlikleriň aýdyň nyşanydyr.
«Mineral dökünleri öndürmegiň giň gerimde alnyp barylmagy we olaryň görnüşleriniň artdyrylmagy ýurdumyzyň agrar pudagynyň mineral dökünlere bolan islegini öz güýjümiz bilen doly kanagatlandyrmaga şert döredýär we olaryň daşary ýurtlara eksportyny ýola goýmaga mümkinçilik berýär» diýip, döwlet Baştutany gutlagynda nygtady.
Döwlet Baştutany bu halkara maslahatyň we serginiň daşary ýurtly hyzmatdaşlar bilen öňdebaryjy tehnologiýalary alyşmakda hem-de täze hyzmatdaşlyk gatnaşyklaryny ýola goýmakda ähmiýetli boljakdygyna ynam bildirdi.
Gutlagynyň ahyrynda Prezident Serdar Berdimuhamedow forumyň gatnaşyjylaryna gurluşyk, senagat, himiýa we energetika pudaklaryny mundan beýläk-de ösdürmek ugrunda alyp barýan işlerinde uly üstünlikleri arzuw etdi.
