Dünýä belli aktýor Jeki Çan öz döredijilik ýolunda özüni ilkinji gezek opera režissýory hökmünde synap görýär. Onuň sahnalaşdyrýan meşhur «Turandot» operasy Italiýada geçiriljek 72-nji Puççini festiwalynda tomaşaçylara hödürleniler.
Bu täze taslama Jakomo Puççininiň şedewr eseriniň ilkinji premýerasynyň 100 ýyllygyna bagyşlanýar we ol 17-nji iýuldan 5-nji sentýabra çenli dowam etjek ýubileý möwsüminiň iň esasy wakasy bolar.
Jeki Çan nusgawy operanyň içine gündogar başa-baş söweş sungatynyň elementlerini we hytaý milli medeniýetiniň aýratynlyklaryny ornaşdyrmagy meýilleşdirýär. Sahnanyň esasy simwollary hökmünde Ajdarha we At saýlanyp alyndy, aýnaly suw howdanlary bolsa bezegleriň üstüni ýetirer.
Operanyň saz ýolbaşçysy Marko Armilýato. Esasy partiýalary bolsa dünýä ýyldyzlary Roberto Alanýa we Olga Maslowa ýerine ýetirerler.
Italiýadaky premýeradan öň, ýagny 2026-njy ýylyň maý aýynda täze öwüşgin berlen köne opera Hytaýyň iri şäherlerinde köpçüilge görkeziler.
