Anthropic kompaniýasy ABŞ-nyň Söwda ministrligi tarapyndan eksport çäklendirmeleriniň aýrylmagyndan soň, Claude Fable 5 we Claude Mythos 5 emeli aň modellerine ählumumy girmegi tapgyrlaýyn dikeldip başlajakdygy barada X sosial ulgamynda habar berdi.
Belli bolşy ýaly, iýun aýynyň başynda ABŞ-nyň häkimiýetleri milli howpsuzlyk ýagdaýlaryna esaslanyp, Fable 5 we Mythos 5 modelleriniň ulanylyşyny çäklendiripdiler. Soňra Anthropic kiberhowpsuzlyk ulgamynda işleýän amerikan kompaniýalarynyň çäklendirilen gurşawyna Mythos 5 modelinden peýdalanmaga rugsat alypdy.
Ýurduň köpçülikleýin habar beriş serişdeleriniň maglumatyna görä, çäklendirmeleri ýatyrmak baradaky karar ABŞ-nyň administrasiýasynyň kompaniýanyň hökümet bilen bilelikde bu modelleriň ulanylmagy bilen bagly töwekgelçilikleri azaltmak boýunça çäreleri durmuşa geçirendigi barada gelen netijesinden soň kabul edildi.
Döwlet gözegçiliginiň güýçlenmeginiň täsiri bilen OpenAI hem özüniň täze GPT-5.6 modeliniň ýaýradylmagyny çäklendirip, oňa girmek hukugyny diňe tassyklanan hyzmatdaşlaryna beripdi.
Şol bir wagtyň özünde, OpenAI-yň ýolbaşçysy Sem Altman häzirki wagtda hereket edýän düzgünleşdiriş tertibiniň «iň gowy usul däldigini» syzdyrýar.
