Eýranda ynsanyň janly nerw öýjüklerini ulanyp, barlaghana şertlerinde emeli beýniniň ilkinji nusgasy döredildi. Bu emeli beýni edil adamyňky ýaly, öz-özünden öwrenmäge ukyplydyr.
Bu habary Mehr News Agency habarlar agentligi Eýranyň Kognitiw ylymlary we tehnologiýalary ösdürmek boýunça geňeşiniň sekretary Atalla Pur-Abbasa salgylanyp mälim etdi.
Onuň aýtmagyna görä, eýranly hünärmenler adamyň nerw öýjüklerini bedeniň daşynda, ýagny ýörite barlaghanada ösdürip ýetişdirmegiň usulyny tapdylar. Şunda bu öýjükler özara birleşip, edil ynsan beýnisindäki ýaly işleýän ulgamlary we baglanyşyklary emele getirýärler. Bu täze açyş geljekde janly öýjüklerden ybarat bolan biologik prosessorlary ýasamaga ýol açar.
Pur-Abbas ýurduň ýokary tehnologiýalar boýunça işleýän kompaniýalarynyň biriniň eýýäm bu gurluşyň ilkinji synag nusgasyny taýýarlandygyny aýtdy.
Ol täze tehnologiýanyň artykmaçlyklary barada durup geçip, onuň maglumatlary örän çalt işleýändigini we togy juda az sarp edýändigini belledi. Alymyň hasaplaýşy ýaly, bu janly ulgam häzirki wagtda kompýuterlerde ulanylýan adaty kremniý çipleri bilen deňeşdirilende, energiýany bir million esse az ulanýar. Ol bu taslamanyň bazarda satuwa çykarylmagy üçin ýene-de bir az wagtyň we goşmaça işleriň gerekdigini, ýöne munuň üçin zerur bolan ähli tehniki ylymlaryň eýýäm ýurduň içinde doly özleşdirilendigini aýtdy.
Ylmy dilde «organoid aň» ýa-da «maglumatlary biologik usulda işlemek» diýlip atlandyrylýan bu tehnologiýa, edil adamyň esasy beýnisiniň işleýşi ýaly işleýän kompýuter ulgamlaryny ýasamak üçin adamyň janly nerw öýjüklerini ulanmagy göz öňünde tutýar.
