Universal Pictures studiýasy «Ýigrenji men» we «Minýonlar» ýaly meşhur multfilmleri çykaran «Illumination» studiýasynyň «Ýeke däl» («Не одни») atly animasion filminiň ilkinji tizer-treýlerini görkezdi. Filmiň dünýä premýerasynyň 2027-nji ýylyň 16-njy aprelinde geçirilmegi meýilleşdirilýär.
Wakanyň merkezinde ýeke gezip, raketa guraýan dymma mehanik Jo we astrobotanik Fren bar. Olar bilelikde dünýäde ilkinji gezek ösümlik ýangyjy bilen işleýän raketany döretmegiň üstünde işleýärler we bilelikdäki işiň barşynda gahrymanlaryň arasynda yşk duýgulary oýanýar.
Jonyň öýünde gaçgak üç sany kiçijik özge planetaly — Dank, Uelli we Şirm gizlenip, olaryň meýilnamalary howp astynda galýar. Özge planetalylar kosmos polisiýasy Zandrodan gizlenýärler we aşyk jübütiň ekologik arassalykdaky raketasynyň öz dogduk planetasyna gaýdyp barmagyň ýeke-täk ýoludygyny çalt düşünýärler.
Baş gahrymanlar Jo we Freni Timoti Şalame hem-de Selena Gomes seslendirdiler. Özge planetalylaryň gülkünç üçlügine Rob Braýdon, Daýana Morgan we Jeými Demetriu ses berdiler. Kosmos polisiýasynyň keşbini bolsa «Ted Lasso» serialynyň ýyldyzy Brett Goldstaýn janlandyrdy.
Ozal Şalameniň «Illumination-yň» täze taslamasyna gatnaşjakdygyny «Feature First» neşiriniň çeşmeleri habar beripdiler. Olaryň maglumatlaryna görä, «Not Alone» Pixar-yň meşhur «Ýokary» («Up») multfilmi ruhunda romantik komediýa hökmünde göz öňünde tutulypdyr. Insaýderler täzeligiň tizeriniň «Minýonlar we monstrlar» filminiň görkezilişinde kinoteatrlarda görkeziljekdigini belläpdiler.
«Minýonlar we monstrlar» filminiň dünýä prokatyna 1-nji iýulda başlandygyny bellemek gerek.
