Internetde Kristofer Nolanyň «Odisseýa» atly giň göwrümli epik filmine ilkinji synlar peýda boldy. Kino tankytçylary gadymy grek şahyry Gomeriň poemasynyň ekranlaşdyrylmagyny uly joşgun bilen garşyladylar we onuň giň möçberliligini, režissýorlyk işini hem-de aktyorlaryň ussatlygyny aýratyn bellediler.
Makala çap edilen pursadynda filmiň Rotten Tomatoes saýtyndaky reýtingi 98%-e (166 synyň esasynda) çenli ýokarlandy, Metacritic saýtynda bolsa 100 baldan 93 bal aldy.
Bu netije Nolan üçin taryhy waka boldy: häzirki wagtda «Odisseýa» onuň Rotten Tomatoes saýtynda iň ýokary baha berlen filmi boldy we režissýoryň «Gara rysar» (94%), «Unutma» (94%), «Oppengeýmer» (93%) we «Dýunkerk» (92%) ýaly ykrar edilen şedewrlerinden hem öňe geçdi.
Hatda IndieWire neşirinden Dewid Erlih bu täze filmi režissýoryň döredijilik ýolundaky «iň gowy işleriniň biri» diýip atlandyrdy.
Synçylar näme diýýärler?
Preston Barta, Denton Record-Chronicle:
– Nolanyň hödürlän «Odisseýa» interpretasiýasy muzeý eksponatyna meňzemekden örän uzakda. Bu hakykatdanam janly, dem alýan güýçdir.
Jeff Nelson, WeHo Times:
– Bu film, kinoteatra gidip, ol ýerden gaýdanyňda, durmuşyňda örän üýtgeşik we aýratyn bir zady başdan geçirendigiňi bilip çykmagyň seýrek duş gelýän pursatlarynyň biridir.
Nikki Gemmell, The Australian:
– Siz «Odisseýany» okanyňyzda: «Muny ekranlaşdyrmak mümkin däl» diýip pikir edýärsiňiz. Ýöne muňa garamazdan, hemme zat ajaýyp çykdy. Nolan bizi gadymy dünýä çagyrýar we üstesine özüne bendi edip, şol ýerde saklaýar. Ol mümkin däl zady başardy.
Emma has seresap we sowukganly pikirler hem boldy: meselem, Variety neşirinden Gaý Loj we The Hollywood Reporter neşirinden Dewid Runi bu filmi «duýgudan daşrak» diýip häsiýetlendirdiler we ony «ukyňy tutdurýan oýun» diýip atlandyrdylar.
Filmdäki wakalar Troýa urşy tamamlanandan soň, patyşa Odisseýiň köp ýyllaryň dowamynda öz öýi bolan Itaka kynçylyk bilen gaýdyp gelişi barada gürrüň berýär.
Režissýor filme hakyky ýyldyzlar toparyny ýygnamagy başardy. Epiki filmde baş rollary Mett Deýmon, Tom Holland, Zendaya, Enn Heteueý, Robert Pattinson, Lupita Niongo we Şarliz Teron dagylar ýerine ýetirdiler.
Odisseýa filminiň görkezilişi käbir ýurtlarda eýýäm başlandy, dünýäniň giň prokatyna we ABŞ-nyň ekranlaryna bolsa bu film 17-nji iýulda çykýar.
