Alymlar doly ysmaz bolan adama ellerini gaýtadan hereket etdirmäge we galtaşyklary duýmaga kömek eden täze nesil neýrointerfeýsiniň synaglarynyň üstünlikli netijeleri barada habar berdiler. Barlagyň netijeleri "Nature Medicine" žurnalynda çap edildi.
Nýu-Ýork ştatyndan Kit Tomas 2020-nji ýylda howuza şowsuz böküşinden soň oňurgasyna agyr şikes aldy we göwresinden aşakda ysmaz boldy. Üç ýyllyk kliniki barlagyň çäginde onuň beýnisine elektrodlar oturdyldy.
Ulgam hereket etmek niýeti baradaky signallary okaýar we olary oňurga ýiliginiň şikeslenen böleginden sowa geçip, göni elleriň myşsalaryna iberýär. Şol bir wagtyň özünde, eliň aýasyndaky datçikler galtaşyklary bellige alýar we signallary yzyna beýnä iberip, duýgurlyk duýgusyny döredýär.
35 hepdelik tälimden soň, näsagyň sag eliniň güýji 86%, çep eliniňki bolsa 62% artdy. Ol gaýtadan özbaşdak bulgurdan içmäge, naharlanmaga, ellerini ýüzüne ýakynlaşdyrmaga, burnuny gaşamaga we ýüzüni süpürmäge başlady. Synaglaryň dowamynda erkek adam näzik predmetleri saklamagy hem öwrendi.
Barlagçylaryň sözlerine görä, tehnologiýa diňe bir şikesiň yzlarynyň öwezini dolmak bilen çäklenmän, eýsem, nerw ulgamynyň täzeden gurulmagyna hem ýardam berýär. Näsagyň sag el biliniň duýgurlygy bölekleýin dikeldi we bu täsir neýrointerfeýs öçürilenden soň hem saklanyp galdy.
Barlagyň awtorlary geljekde şeýle tehnologiýanyň oňurga ýiliginiň agyr şikesleri bolan adamlara kömek edip biljekdigine ynanýarlar.
