ABŞ-nyň Prezidenti Donald Trampyň administrasiýasy 60 söwda hyzmatdaşyna garşy täze import paçlarynyň girizilýändigini yglan etdi. Täze nyrhlaryň möçberi 10% we 12,5% bolar diýip, CNN habar berýär.
ABŞ-nyň Söwda ministrliginden täze çäreleriň getirilýän harytlaryň 99,4 göterimine degişlidigini mälim etdiler. Täze paçlaryň sebäbi şol ýurtlaryň «mejbury zähmet arkaly öndürilen harytlaryň importyna bolan gadaganlygy» girizmändigi ýa-da ýeterlik derejede berjaý etmeýändigi bilen düşündirildi.
12,5 göterimlik nyrh, hususan-da, Hytaýdan, Russiýadan we Türkiýeden getirilýän harytlar üçin bellenildi. Ýewropa Bileleşiginiň ýurtlaryndan, Taýwandan, Ýaponiýadan, Günorta Koreýadan we Şweýsariýadan getirilýän önümler üçin paç, öňden hereket edýän söwda tarifleri hem göz öňünde tutulyp, 10% ýa-da 12,5% bolar.
2025-nji ýylyň ýazynda Donald Trampyň administrasiýasy dünýäniň köp ýurtlaryndan import edilýän harytlara paçlary köpçülikleýin ýokarlandyryp başlapdy. Soňra ABŞ-nyň Ýokary kazyýeti bu çäreleri bikanun hasaplap, olaryň ýatyrylmagyny talap etdi. Kazyýet Prezidentiň Halkara adatdan daşary ykdysady ygtyýarlyklar baradaky kanuna (IEEPA) salgylanyp, paç girizmäge hukugynyň ýokdugy barada karar çykardy.
Ak tam bolsa, kazyýetiň gadaganlygyny aýlanyp geçmek üçin dessine başga bir kada — 1974-nji ýylyň Söwda baradaky kanunynyň 122-nji bölümi (töleg balansynyň defisiti barada) boýunça herekete geçdi. Şol esasynda 10 göterimlik wagtlaýyn global ýygym hem girizildi.
Kanuna görä, 122-nji bölüm boýunça çäreler Kongresiň makullamasy bolmazdan 150 güne çenli hereket edip bilýär. Bu kanuny мöhlet hut anna güni, 2026-njy ýylyň 24-nji iýulynda tamamlandy.
